بەرێ کوردستانا سووریێ رادگهینە، ئەو رێکكەفتنا د ناڤبەرا فەرماندارێ گشتییێ هه‌سه‌دێ مەزلووم عەبدی و سەرۆکێ قۆناغائا سووریەیێ ئەحمەد و شەرع دە، دەستپێکا چێکرنا ئارامیێ ل تەڤاهیا سووریێ دبینن. د هەمان دەمێ دە ژی داخوازیێن گەلێ کورد ب جهـ نایینە».
سەرۆکاتیا سووریەیێ دوهـ 10ێ ئادارا 2025ان بەلاڤ کر، سەرۆکێ قۆناغا ڤەگوهێز یا سووریەیێ ئەحمەد شه‌رع و فەرماندارێ گشتییێ هێزێن سووریەیا دەمۆکراتیک (هه‌سه‌دێ) مەزلووم عه‌بدی رێکكەفتنەک ژ 8 خالان پێک تێ ئیمزە کرن. تێ دە تەکەزی ل سەر یەکپەرچەیییا خاکا سووریەیێ، تەڤلیبوونا هێزێن هه‌سه‌دێ د ناڤا سازیێن دەولەتێ دە و ئاگربەستێ هات کرن.
بەرێ کوردستانا سووریێ ئیرۆ 11ێ ئادارا هەلوەستا خوە ژ ڤێ رێکكەفتنێ نیشان دا و ئەڤێ ل ژێر، دەقا وێ یە:
«ئەم د بەرێ کوردستانا سووریێ دە رێکكەفتنا د ناڤبەرا سەرۆکێ رێڤەبەریا نوو ئه‌حمه‌د ئەل-شەرع و فەرماندارێ هه‌سه‌دێ مەزلووم عه‌بدی ل شامێ رۆژا 10.03.2025ان دە هاتیە ئیمزەکرن، دەستپێکا چێکرنا ئارامیێ ل تەڤاهیا سووریێ دبینن. د هەمان دەمێ دە ژی داخوازیێن گەلێ کورد ب جهـ نائینە و تەنێ ژ بۆ خورتکرنا دەستهەلاتا رێڤەبەریا نوو ل شامێ ل سەر حه‌سابێ مافێن گەلێ مەیە، بێیی کو پابەندبوونەکە راستەقینە ب مسۆگەرکرنا مافێن گەلێ کورد د دەستوورا وەلات دە هەبە.
ئیمزەکرنا رێکكەفتنێ ژ ئالیێ مەزلووم عه‌بدی ڤە، کو فەرماندارەکی لەشکەرییە و نه نوونەرەکی سیاسییە، نایێ قەبوولکرن و نابە ب تەنا سەرێ خوە ل سەر رێکكەفتنێن دەربارێ چارەنڤیسا گەلێ کورد ل سووریێ ئیمزە بکە. ئەم دبینن ئەڤ رێکكەفتن رێ ل بەر ڤەگەراندنا دەستهەلاتداریا ناڤەندی ل کوردستانا سووریێ خوەش دکە و هەر دەستهەلاتەکە کوردی تونە دکە.
یا هەری مەترسیدار ئەوە، کو ئەڤ رێکكەفتن تەڤاهیا هەولێن نێزیکبوونا کوردی تێک ددە و ئاستەنگیان ل بەر چێکرنا شاندەکە کوردی یا هەڤبەش کو نوونەرتیا بەرژەوەندیێن نەتەوی یێن گەلێ مە د دانوستاندنێن بێ دە ل شامێ، دەردخە. ئەڤ رێکكەفتن خویا دکە کو هه‌سه‌ده بریارێن چارەنووسەر دخە دەستێ خوە ب تەنێ و هێزێن نشتمانی یێن کورد دوور دخە، هەروها هەلوەستا کوردان د هەر پێڤاژۆیەکە دانوستاندنان دە لاواز دکە.
ئەڤ رێکكەفتن تەنێ د چارچۆڤەیا مافێن هەموەلاتیبوونێ دە ب کوردان رە دانوستاندنێ دکە، و پشتگوهـ دکە کو ئەو نەتەوەکە سەرەکەنە ل سووریێ. ئەڤ یەک د دوورخستنا کوردان ژ پێکئانینا حکوومەتا دەمکی، کۆنگرەیێ گۆتووبێژا نشتمانی یا سووری و کۆمیتەیا چێکرنا رەشپلکا راگهاندنا دەستووری دیار دبە. گرێدانا مافێن کوردان تەنێ د چارچۆڤەیا مافێن هەموەلاتیبوونێ دە، مافێن وان یێن نەتەوی مسۆگەر ناکە. دڤیابوو ئالیەکە ناڤدەولەتی یا گارانتۆر هەبوویا، کو تەڤاهیا ئالیان دەربارێ مافێن گەلێ کورد پابەند بکرا، دا کو ئەڤ رێکكەفتن نەبە تەنێ گاڤەکە تەکتیکی و سبە ژێ پاش ڤە ڤەگەرن.
ئەم، وەکە بەرێ کوردستانا سووریێ، دبینن هەر رێکكەفتنەک دەستپێکەکە باشە ژ بۆ گۆتووبێژان و رێیەکە ژ بۆ چێکرنا ئارامیێ و دوورخستنا ئەگەرێن هەر شەرەکی ل پێش سووریێ. د هەمان دەمێ دە ئەم تەکەز دکن، کو نابە دەست ژ مافێن نەتەوی یێن رەوا یێن گەلێ مە بێ بەردان و دڤێ د دەستوورێ دە بێنە گارانتیکرن».
