دەم پارتی بۆ پرۆسەیا ئاشتیێ لگەل سێ پارتیێن دن یێن ترکیەیێ دجڤە

شاندا دەم پارتیێ پرۆسەیا نوویا ئاشتیێ ل ترکیێ و باکورێ کوردستانێ لگەل ھەر سێ پارتیێن سەعادەت، پاشەرۆژ و پالەیێن ترکیەیێ گەنگەشە دکە.

گەرا دویێ یا سەردانێن شاندا پارتیا وەکھەڤی و دەمۆکراسیا گەلان (دەم پارتی) ژ بۆ جەم پارت و ئالیێن سیاسی دەست پێ کریە و ئیرۆ (چارشەمبی، 12/3/2025) ئەو شاند سەردانا سێ پارتیێن دنێن سیاسی دکە.

ل گۆر راگەھاندنا فەرمی، ھەڤسەرۆکێن دەم پارتیێ تولای ھاتمۆغلاری و تونجەر باکرھان ئیرۆ (چارشەمبێ، 12/3/2025) سەردانا پارتیا سەعادەتێ، پارتیا پاشەرۆژێ و پارتیا پالەیێن ترکیەیێ دکە، ب مەرەما دانووستاندنان ل سەر پەیاما رێبەرێ پارتیا کارکەرێن کوردستانێ یێ زیندانکری عەبدوللا ئۆجالان و پرۆسەیا نوویا ئاشتیێ ل ترکیێ و باکورێ کوردستانێ.

ھەروەسا بریارە کو، شاندا دەم پارتیێ ھەر ژ بۆ وێ مەرەمێ ل رۆژا دوشەمبا بهێت (17/3/2025) سەردانا پارتیا تەڤگەرا نەتەوەیی (مەھەپێ) و پارتیا داد و پێشخستنێ یا ترکیەیێ (ئاک پارتی) بکە.

گەرا دویێ یا سەردانێن شاندا دەم پارتیێ ل رۆژا ١٠ێ ڤێ مەھێ دەست پێ کر و ل دەستپێکێ ئەو شاند لگەل پارتیا گەلا کۆماری (جەهەپێ)، پارتیا زەحمەتکێشان و پارتیا پاشەرۆژێ (دەڤا) جڤیا و دانوستاندن ل سەر قۆناغا پشتی پەیاما ئۆجالان و پرۆسەیا نوویا ئاشتیێ کرن.

پەیاما ئۆجالان ژ بۆ ھلوەشاندنا پەکەکێ

شاندا ئیمرالیێ ل رۆژا پێنجشەمێ، 27/2/2025، پشتی جڤینا خوەیا لگەل رێبەرێ پارتیا کارکەرێن کوردستانێ عەبدوللا ئۆجالان، د کۆنفەرانسەکا رۆژنامەڤانی دە پەیاما ئۆجەلان یا ب ھەر دو زمانێن کوردی و ترکی خواند.

سەرۆکێ شارەزاداریا مەزنا وانێ یێ ژکاردەرخستی ئەحمەد تورک پەیاما ئۆجالان خواند کو تێ دە ھاتیە، “پەکەکە د دەمەکێ دە ھاتبوو دامەزراندن کو رێیا دەمۆکراسیێ ھاتبوو گرتن.” ھەروەسا گۆتیە، “دڤێت زمانێ ئاشتی و دەمۆکراسیێ بهێتە پێشخستن.”