پارتییا نژادپەرست یا ترکیێ: ئەم ل بەندێ نە کو بانگا ئیمرالیێ بهێتە جێبەجێکرن

جیگرێ سەرۆکێ گشتی یێ مەھەپێ عزەت ئولڤی یۆنتەر دبێژە: “ئەم د وێ باوەریێ دە نە کو دێ رێخستنا تیرۆرێ کۆنگرەیا خوە ئەنجام دت و د دەمەکێ پر کورت دە خوە هلوەشینت. ئەم ل بەندێ نە کو بانگا 27 شوباتێ یا ئیمرالیێ بهێتە جێبەجێکرن.”

یۆنتەر د بن کۆنێ فتارێ دە ل گەل ئەندام و ئالیگرێن مەھەپێ جڤیا و ئاخاڤتنەک کر

یۆنتەر د داخویانیا خوە یا ژ بۆ چاپەمەنیێ دە گۆت، “ئەم دێ پێکڤە ترکیەیەکا بێ تیرۆر ئاڤا بکن. ھەولدانێن سەرۆکێ مەیێ برێز و خەباتا سەرۆکێ مەیێ رێزدار د ڤی واری دە نە.”

یۆنتەر دیار کر کو تێکۆشینا ل دژی تەرۆرێ دێ ب بریارداری بەردەوام بت و وھا دەوام کر:

“ئەم د وێ باوەریێ دە نە کو رێخستنا تەرۆرێ دێ کۆنگرەیا خوە ئەنجام دت و د دەمەکێ پر کورت دە خوە هلوەشینت. ئەم ل بەندێ نە کو بانگا 27ێ شوباتێ یا ئیمرالیێ بهێت جێبەجیکرن. ئەم ڤێ یەکێ ژ بۆ پاشەرۆژا خوە یا ھەڤپار، سەرخوەبوونا خوە، ھەبوونا خوە یا نەتەوی و ئۆلی و ئالا خوە یا کو قەت ناکەڤە، خوەدی گرینگیەکا دیرۆکی دبینن. کورد و ترک برایێن ھەڤن، عەلەوی و سونی برایێن ھەڤن. کی موداخەلێ بکە ئاژاوەگیرەکێ بێ حەقدەست و سیخورێ داگیرکەرانە. خویایە پارتیەکا ئۆپۆزسیۆنێ ھەیە کو ژ ھەوایا ترکیەیێ یا ئاشتی، ئارامی و براتیێ دترسە، خەمگینە، چاڤنەبارە و دترسە. پارتیا کۆماری یا گەل نکارە رزگاریا ترکیێ ژ تیرۆریزمێ تەحەموول بکە. ھندەک کۆمێن کو ژ تیرۆر و جوداخوازیێ مفای وەردگرن، تەحەموولا رابوونا ب ھەیبەت یا ترکیەیێ، شیاربوونا مەزن، ڤی روحێ یەکیتی و براتیێ ناکن.”