سەرۆکێ حكوومه‌تا هەرێما کوردستانێ پێشوازیا سەرۆکێ یەکیتیا نشتیمانی یا کوردستانێ دکە و پێ رە تەکەزێ ل سەر گرنگیا پێکئانینا کابینەیا نوو ب زووترین دەم دکە.
سەرۆکێ حكوومه‌تا هەرێما کوردستانێ مەسروور بارزانی پشتی نیڤرۆیا ئیرۆ (یەکشەم، 16.03.2025) پێشوازیا سەرۆکێ یەکیتیا نشتیمانی یا کوردستانێ (یه‌نه‌كێ) بافل تالەبانی کر.
هەر دو ئالیان د وێ جڤینێ دە دانووستاندن ل سەر پێنگاڤ و رێکارێن پێکانینا کابینەیا دەهێ یا حكوومه‌تا هەرێما کوردستانێ کرن، هەروەسا ل سەر گرنگیا پێکانینا حكوومه‌تەکە بهێز و هەڤگرتی و خزمەتکار ب زووترین دەم هەڤنەرین بوون.
سەرۆکوەزیرێ هەرێما کوردستانێ و سەرۆکێ یه‌نه‌كێ پشتی وێ جڤینێ د داخویانیەکە رۆژنامەڤانی دە تەکەز کر کو، ئەو جڤین گەلەک باش بوو و ب ئاوایەکی ئەرێنی ب رێ ڤە چوو.
سەرۆکێ یه‌نه‌كێ د ڤی واری دە گۆت، «جڤینا مە گەلەک باش بوو. مە ل سەر چەند تشتێن ستراتەژیک ل هەڤ کر، کو ژ بۆ گەلێ مە باش بن». تەکەز ژی کر، «جڤینێن مە ژی دێ بەردەوام بن و ئارمانجا مە هەر دو ئالیان ئەوە کو، ب زووترین دەم حكوومه‌تەکێ ژ بۆ خزمەتکرنا گەلێ خوە چێ بکن».
سەرۆکێ حكوومه‌تا هەرێما کوردستانێ ژی تەکەز کر، «ئەڤ جارا دویێ یە کو ئەم جڤینێن باش و ئەرێنی دکن، ژ بۆ کو ئەم ل هەڤ نێزیک ببن و دانووستاندنان ل سەر وان مژارێن گرنگ بکن یێن کو ژ بۆ خەلکێ کوردستانێ و دەڤەرا مە ب گشتی گرنگن».
سەرۆکوەزیر مەسروور بارزانی هەروەسا گۆت، «پێشکەفتن و هەڤفێمکرنێن گەلەک باش ل سەر وان مژاران هەبوونە، و ئەز هێڤیدارم تیم ژی بکارن ژ بۆ پێکانینا حكوومه‌تێ د دەمەکە نێزیک دە هەر ب وێ روهیەتێ بگەهن لهەڤکرنەکە تەمام، ژ بۆ کو دلێ خەلکێ کوردستانێ ب پێشڤەچوونا دانووستاندنێن مە خوەش ببە».
