ھێزێن سووریەیا دەمۆکراتیک (ھەسەدێ) شەڤا بۆری راگەھاند، “د ئێریشەکا ئاسمانی یا ترکیەیێ ل سەر باژارێ کۆبانێ دە، 9 کەس ھاتن کوشتن.”
ھێزێن سووریەیا دەمۆکراتیک (ھەسەدێ) ل سەر تۆرا جڤاکی یا تیلیگرامێ پارڤە کریە، “بالافرەکا ترکیەیێ ل دەرەنگێ شەڤا بۆری یەکشەمبێ، 16/3/2025 مالباتەک بۆمبەباران کر، کو ل باشوورێ کۆبانێ مژوولی چاندنێ بوو.”
ھەسەدێ ئاماژە ژی دا، “د ئێریشا بالافرا ترکیەیێ ل سەر دەڤەرا ناڤبەرا ھەر دو گوندێن قومجی و بەرخ بۆتانێ دە، ل باشوورێ کۆبانێ 9 کەس ژ بنەمالەکێ ھاتن کوشتن و دو کەسێن دن ژی یێن یەک مالباتێ بریندار بوون.”
ھێزێن سووریەیا دەمۆکراتیک (ھەسەدێ) کو ژ ئالیێ ئامەریکایێ ڤە پشتەڤانیا وان تێ کرن سەرکردەتیا شەرێ دژی داعشێ کر، ھەتا وێ دەما کو داعش ل سالا 2019 بداوی ئانی.
ئەڤ دەمەکە ترکیە یەکینەیێن پاراستنا گەل (یەپەگە)، کو ستوونا پشتا ھێزێن سووریەیا دەمۆکراتیک (ھەسەدێ)نە، ب پەیوەندیێن ل گەل پارتیا کارکەرێن کوردستانێ (پەکەکێ) تۆمەتبار دکە، کو ئەنقەرە و وەلاتێن رۆژئاڤا پەکەکێ وەکی “رێکخستنەکا تەرۆرستی” دحەسبینن.
رێبەرێ پارتیا کارکەرێن کوردستانێ (پەکەکێ)یێ زیندانکری عەبدللا ئۆجالان د مەھا شباتێ دە بانگەکا دیرۆکی پارڤە کر و داخواز ژ پارتیا خوە کر کو، چەکی دانە و خوە ھلوەشینە.
ترکیەیێ پەیوەندیەکا نێزیک لگەل سەرۆکێ سووریەیێ یێ دەمکی ئەحمەد شەرع چێ کریە، گڤاشتنان دخە سەر دەستھلاتا نوویا سووریەیێ ژ بۆ ڤەدیتنا چارەیەکێ ژ بۆ پرسا یەکینەیێن پاراستنا گەل (یەپەگێ).
