رێڤەبەریا خوەسەر ژ بۆ کۆمکوژیا ل کۆبانیێ داخوازا لێپرسینەکە ناڤنەتەوەیی کر

رێڤەبەریا خوەسەر ژ بەر کۆمکوژیا ل کۆبانیێ بانگی جڤاکا ناڤنەتەوەیی کر و خوەست کو دەربارێ کۆمکوژیێ دە لێپرسینەکە ناڤنەتەوەیی وەرە ڤەکرن.

ئیرۆ سبەهێ ساعەت دەردۆرا 04:00ان د ئێرشەکە درۆنی یا ترکیەیێ دە ل گوندێ بەرخبۆتانێ یێ باژارێ کۆبانیێ یێ رۆژئاڤایێ کوردستانێ 9 سڤیلان جانێ خوە ژ دەست دا و 2 ژی بریندار بوون.

رێڤەبەریا خوەسەریا دەمۆکراتیکا هەرێما باکور و رۆژهلاتێ سووریەیێ ل سەر کۆمکوژیێ داخویانیەکە نڤیسکی بەلاڤ کر.

رێڤەبەریا خوەسەر د داخویانیا خوە دە وها گۆت:

“دەولەتا ترک سیاسەتێن خوە یێن دژمناهی و پێکئانینا سووجێن شەر و سووجێن ل دژی مرۆڤاهیێ یێن ل دژی گەلێ باکور و رۆژهلاتێ سووریەیێ ددۆمینە. ب ڤێ یەکێ هەموو قانوونێن ناڤنەتەوەیی و ئۆلان، بنپێ دکە.

شەڤێ دن و د بەردەوامیا ڤان سیاسەتێن سووجدار دە دەولەتا ترک یا داگیرکەر کۆمکوژیەک ل دژی شێنیێن گوندێ بەرخبۆتانێ یێ باشوورێ کۆبانیێ پێک ئانی و د ئەنجاما وێ دە 9 سڤیل کو پرانیا وان ژن و زارۆک بوون شەهید بوون و هن ژی بریندار بوون.

کۆمکوژیا بەرخبۆتانێ نە کۆمکوژیا یەکەمە کو ئاموورا شەر یا ترکیەیێ ل دژی هەرێما باکور و رۆژهلاتێ سووریەیێ و گەلێ وێ پێک تینە.

ئەڤ یەک ل پێشیا چاڤێن رێخستنێن ناڤنەتەوەیی و جڤاکا ناڤنەتەوەیی تێنە کرن بێیی کو تشتی بکە و دبە بێدەنگیا جڤاکا ناڤنەتەوەیی و رێخستنێن وێ یێن پێوەندیدار ب مافێن مرۆڤان رە دەستەکێ ددە دەولەتا ترک دا کو زێدەتر سووجێن شەر ل هەرێمێ، پێک بینە.

ئەم د رێڤەبەریا خوەسەریا دەمۆکراتیکا هەرێما باکور و رۆژهلاتێ سووریەیێ دە د دەما کو ئەم سووجێن کو دەولەتا ترک ل دژی هەرێم و گەلێ مە پێک تینە شەرمەزار دکن، ئەم بانگی جڤاکا ناڤنەتەوەیی ب هەموو سازیێن وێ دکن هەر وها کۆئالسیۆنا ناڤنەتەوەیی یا ل دژی داعشێ کو هەلوەستا خوە ل هەمبەری ڤان کۆمکوژیان ئەشکەرە بکن و ژ بێدەنگیا خوە دەرکەڤن.

ژ بەر ڤی گەلی ل شوونا تەڤاهی جیهانێ و د شەرێ ل دژی تەرۆریستا جیهانی کو داعشێ نوونەرتیا وان دکر، زارۆکێن خوە کرن قوربان.

هەر وها ئەم بانگ دکن کو لێپرسینەکە ناڤنەتەوەیی د ڤێ دەربارێ دە وەرە ڤەکرن و دۆسیایا کۆمکوژی و سووجێن شەر کو دەولەتا ترک یا داگیرکەر پێک تینە رادەستی دادگەها جەزایان یا ناڤنەتەوەیی، وەرە کرن.

ئەم سەرساخیێ ژ مالبات و خزمێن شەهیدان رە و ژ تەڤاهی گەلێ خوە رە دخوازن. هێڤیا باشبوونێ ژ بریندارێن خوە رە دخوازن.

ئەم ژ گەلێ خوە تەقەز دکن کو خەباتێن مە ژ بۆ داخوازا مافێن خوە ژ دەولەتا ترک یا ژ بەر کۆمکوژی و سووجێن شەرێن کو دکە، ددۆمینن و ئەم پشتراست دکن کو ئەڤ کریار دێ مە ژ بەردەوامکرنا رێیا مە د ئاڤاکرنا سووریەکە دەمۆکراتی، نەناڤەندی و ئازاد دە دوور نەخە”.