بەری 6 سالان، د 20/1/2018 دە ئارتێشا ترکیێ و کۆمێن چەکدارێن سەر ب وێ ڤە دەست ب ئێریشا ل سەر عەفرینێ کرن و پشتی شەرێ 58 رۆژان عەفرین و گوندەوارێن وێ داگیر کرن. د ئەنجاما داگیرکرنا عەفرینێ دە، زێدەتر ژ ھەزار وەلاتیێن کوردێن عەفرینێ شەھید و بریندار بوون، دۆرا 350 ھەزار وەلاتی ژی ب نەچاری دەربدەر بوون. پشتی 6 سالان ژ داگیرکرنێ ژی، هێژان بنپێکرنێن مرۆڤی، دزی و تالان، برین و دزینا داران، دەستدانانە سەر مال و ملکێن خەلک و گوھارتنا دەمۆگرافیا عەفرینێ بەردەوامە.
پشتی شەرێ 58 رۆژان، ئارتێشا ترکیەیێ و کۆمێن چەکدارێن سەر ب وێ ڤە د رۆژا 18/3/2018 دە دەرباسی باژارێ عەفرینێ و گوندەوارێ وێ بوون و داگیر کرن و دەست ب دزی و تالانا مال، ئاڤاھیێن فەرمی، دکان و سامانێن وەلاتیێن سڤیل کرن.
د ئێریشێ دە، مالێن سڤیلان، دبستان، ئاڤاھیێن فەرمی، نەخوەشخانە، مزگەفت، جھێن دیرۆکی و پیرۆز و ژێرخانەیا عەفرینێ ھاتن بۆمەبارانکرن و وێرانکرن.
ژ بەر ئێریشێ و ل گۆر ئامارێن ھاتنە راگھاند، زێدەتر ژ 300 وەلاتیێن عەفرینێ یێن سڤیل شەھید بوون و زێدەتر ژ 700 سڤیلان ژی بریندار بوون. ھەروھا دۆرا 350 ھەزار عەفرینی ژی ب نەچاری کۆچبەر و دەربدەر بوون، هەژمارەکا مەزن ژ وان ل گوندێن د ناڤبەرا عەفرین و حەلەبێ دە ھاتن بجھکرن و هەژمارەک دن ژی بەرێ خوە دا ھەرێمێن دن یێن کوردی و ھەرێما کوردستانێ.
ژ رۆژا کو عەفرین کەتیە بن داگیرکەریا ترکیەیێ ڤە گرتن، بنپێکاریێن وەکی دزی، تالان، دەستدرێژی، بریندارکرن، کوشتن، رەڤاندن و شکەنجەیێن ل ھەمبەری کوردێن وێ ھەرێمێ بەردەوام دکن.
ژ بلی ڤان تاوانان ھەول دهێت دان کو سرووشتێ عەفرینێ ژی بهێت تالانکرن. هەر وەها ل گۆر ئاگاهیێن ژ هەرێمێ، ئارتێشا ترکیەیێ و کۆمێن چەکدار زێدەتر ژ 50 جھێن شوونواری، گرێن دیرۆکی و مەزارگەھێن ئۆلی کۆلانە و زێدەتر ژ 20 ھەزار پەرچەیێن ئەنتیکان دزینە و ڤەگوھاستنە ترکیەیێ.
ل عەفرینێ گەلەک جھێن دیرۆکی ھەنە، ژ بلی کەلەھا ھۆری، کەلەھا سامانێ، شکەفتا دودەری، کەنیسەیا مارمارۆن و ب دەھان شوونوارێن دن، نێزیکی 25 گرێن دیرۆکی ھەنە، پرانیا وان د بەر چەمێ عەفرینێ رە رێزکری نە، کو دیرۆکا وان ڤەدگەرە ھەزار ھەتا 2 ھەزار سالان بەری زایینێ، پرانیا وان گران ب ئالاڤێن کۆلاندنێ ھاتنە کۆلاندن و تێکدان و کۆمێن چەکدار پارەک ژ وان گران ژی کرنە ناڤەندێن سەربازی.
هەر وەها، چەکدارێن د بن کۆنترۆلا ترکیێ دە ھەتا نھا پرانیا دار زەیتوونێن خەلکێ بڕینە و دار و بەرێن عەفرینێ تالان کرنە.
داگیرکەر باجێن جودا جودا ل سەر خەلکێ کو دخوازن ڤەگەرن عەفرینێ فەرز دکن.
دیسا داگیرکەر ھەول ددن کو نەھێلن کورد ل پەی کەڤنەشۆپیێن خوە ژی ھەرن.
نەورۆزا 2023 کۆمکوژیەک چێبوو.
عەرەبێن ھاوردە، ل جندرێسێ ژ بەر کو ئاگرێ نەورۆزێ پێ خستبوو 4 کەسێن ژ یەک مالباتێ شەھید کربوون.
