جڤینا ئەنجوومەنا نشتیمانی یا کورد ل سووریەیێ (ئەنەکەسێ) و پارتیا یەکیتیا دەمۆکرات (پەیەدێ) ب ئامادەبوونا فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی ل باژارێ حەسەکەیێ یێ رۆژئاڤایێ کوردستانێ دەست پێ کر.
ل گۆر ئاگاهیان، ئەو جڤین ژ بۆ رێکخستنا ناڤمالا کوردان ل رۆژئاڤایێ کوردستانێ و پێکانینا شاندا ھەڤپار ژ بۆ دانووستاندنێن لگەل شامێ و گەرەنتیکرنا مافێن گەلێ کورد ل سووریەیێ یە.
ئەڤ جڤینا دویێ یا ناڤبەرا شاندا دانوستاندنانا ئەنەکەسێ لگەل فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی یە د دەما کێمتر ژ ھەفتیەکێ دە، کو ژ بۆ رێکخستنا ناڤمالا کوردان دجڤن.
بریارە پشتی تەمامبوونا وێ جڤینێ، ھەر دو ئالی راگەھاندنەکا ھەڤپار ژ بۆ رایا گشتی پارڤە بکن.
ئەڤ جڤین د دەمەکێ دەیە کو، شاندەکا ئەنەکەسێ ل رۆژا پێنجشەما بۆری لگەل فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی جڤیا و ب ئاوایەکی گشتی دانووستاندن ل سەر رەوش و پێشھاتێن سووریەیێ کرن.
