ئەندامێ کۆمیتەیا بجھانینێ یا پەکەکێ موراد قەرەیلان د چاڤپێکەفتنەکا تلەڤزیۆنی دە لگەل کانالا پارتیا خوە پابەندبوونا رێکخستنێن پەکەکێ ب بانگا رێبەرێ پەکەکێ یێ زیندانکری عەبدوللا ئۆجالان بۆ دانانا چەکی و خوەھەلوەشاندنێ تەکەز کر و گۆت، “لێ دڤێت حکوومەتا ترکیەیێ دەرفەتێ ب ئۆجالان بدە کو بکارە پرۆسەیا ھەلوەشاندنا پەکەکێ ب رێ ڤە ببە.”
موراد قەرەیلان ھەروەسا گۆت، “ئەگەر ترکیا وێ یەکێ نەکە، پرۆسەیا چارەسەریێ دێ گەهیتە بنبەستێ.” تەکەز ژی کر، “ئەم ژ بۆ ھەر ئحتیمالەکا شەری، ئاشتی و پرۆسەیا چارەسەریێ ئامادە نە.”
د دەرھەقا داخویانیا وەزیرێ بەرگریێ یێ ترکیەیێ دە، کو گۆتبوو “نابە پەکەکە بەحسا ئاگربەستێ بکە و دڤێت یەکسەر خوە ھەلوەشینە”، قەرەیلان گۆت، “ئەو رەفتار و داخویانی گونجایی نینن و دبن سەدەما تێکدانا پرۆسەیا چارەسەریێ و دڤێت ترکیە پێنگاڤێن پێدڤی باڤێژە.”
ناڤبری ھەروەسا راگەھاند کو ھەلسەنگاندنێ ژ بۆ پێشھاتێن پشتی بانگا عەبدوللا ئۆجالان دکن و گۆت، “ممکنە نەورۆزا 2025 ژ بۆ ئازادیا ئۆجالان و چارەسەریا پرسا کوردان دەستپێکا نوو بت.”
ئەندامێ کۆمیتەیا بجھانینێ یا پەکەکێ ھەروەسا گۆت، “ژ بۆ کو ئەڤ پرۆسە سەرکەفتی بە، دڤێت شەرت و مەرج بێن دابینکرن ژ بۆ کو ئۆجالان بهێت ئازادکرن و ب ئاوایەکی چالاک تەڤلی وێ پرۆسەیێ ببە، ژ بەر کو چەکدانان پرۆسەیەکە و تەنێ عەبدوللا ئۆجالان دکارە رێبەریتیا وێ بکە. ھەروەسا دڤێت دەولەت ژی چاکسازیا قانوونی بکە.”
