فەرماندارێ گشتییێ هێزێن سووریەیا دەمۆکراتیک (هه‌سه‌دێ) رادگهینە، جڤینا ئه‌نه‌كه‌سێ و په‌یه‌دێ گاڤا یەکەمین بوو د رێزە-هەڤدیتنان دە ژ بۆ پێکانینا یەکرێزییا کوردی.
ئەنجوومەنا نشتیمانی یا کورد ل سووریەیێ (ئه‌نه‌كه‌سه) و پارتیا یەکیتیا دەمۆکرات (په‌یه‌ده) ب ئامادەبوونا فەرماندارێ گشتییێ هێزێن سووریەیا دەمۆکراتیک (هه‌سه‌دێ) مەزلووم عه‌بدی، ئیرۆ ل باژارێ حەسەکێ یێ رۆژئاڤایێ کوردستانێ جڤیان.
فەرماندارێ هه‌سه‌دێ مەزلووم عه‌بدی پشتی جڤینێ ل هەژمارا خوە یا تۆرا جڤاکی «X» دەربارێ جڤینێ دە نڤیسی: «ئیرۆ، هەردو ئالیێن کوردی، په‌یه‌ده و ئه‌نه‌كه‌سه، ژ بۆ دیارکرنا نەخشەرێیەک هەڤبەش و یەکرنا رێزا کوردی د قۆناغا هەیی دە، ل هەڤ جڤیان».
هەروها گۆت: «هەلوەست و نێرینا هەردو ئالیان جهێ کێفخوەشیێ بوون. ئەڤ گاڤا یەکەمین بوو د رێزە-هەڤدیتنان دە ژ بۆ پێکانینا یەکرێزییا کوردی».
فەرماندارێ هه‌سه‌دێ دا زانین ژی، «ژ بۆ پێکئانینا سووریایەکە پر-رەنگ و دەمۆکراتیک، کو مافێ هەمو پێکهاتەیان تێ دە مسۆگەر بە، ئەم ب ئیسرارن ڤێ دیالۆگێ بسەر بخینن».
