قائیمقامێ ئاکرێ: نەورۆزا ئیسال جیاوازتر دبە

قائیمقامێ قەزایا ئاکرێ دلەوار بۆزۆ دیار کر، وان ئامادەکاریێن ئاهەنگا نەورۆزێ کو بەریا 2 مەهان دەست پێ کربوون، ب داوی کرنە.

دلەوار بۆزۆ ئیرۆ 19ێ ئادارێ ژ ک24ێ رە راگهاند، وان ئامادەکاریێن ئاهەنگا نەورۆزێ ب داوی کرنە و 2 هەزار جوانێن خوەبەخش دێ شەڤا نەورۆزێ ب هلگرتنا مه‌شه‌خه‌لان بچن چیایێ کەلێ.

قائیمقامێ قەزایا ئاکرێ بال کشاند سەر وێ یەکێ، ئالایەکە کوردستانێ یا ب درێژاهیا 100 مەترە و پانیا 10 مەترۆیان هاتیە ئامادەکرن.

دیار کر ژی، کارێ نووژەنکرنێ یا رێیا ژ گرێ ئاکرێ دادکەڤە یا کو د سالا تەمام بوویە ب داوی بوویە، کو دێ گەلەک رەحەتیێ ژ مێڤان و خەلکێ رە پەیدا دکە.

قائیمقامێ ئاکرێ تەکەز کر، نەورۆزا ئیسال ژ سالێن بۆری جوداتر دبە و سەرۆکوەزیرێ هەرێما کوردستانێ ب خوە ژی چاڤدێریا پێشکەفتنا کار دکە.

ئەڤ سالا دویەمینە کو نەورۆز د مەها رەمەزانێ دە دەرباس دبە، ژ بەر ڤێ یەکێ ل ئاکرێ چالاکیێن پێخستنا ئاگرێ نەورۆزێ پشتی فتارێ دێ بێن کرن.