سەرۆک مەسعوود بارزانی ئیرۆ 20ێ ئادارێ پەیامەک ب بۆنەیا جەژنا نەورۆزێ و ھاتنا سەرسالا کوردی بەلاڤ کر و تێ دە راگھاند، “ل جەژنا نەتەوەیی یا نەورۆزێ دا ب روومەت ڤە تەکەزیێ ل سەر چاندا پێکڤەژیان و پەیاما ئاشتیخوازانەیا گەلێ کوردستانێ دکم.”
پەیاما سەرۆک بارزانی:
ب ناڤێ خوەدایێ مەزن و دلۆڤان
نەورۆز ژ بۆ گەلێ کوردستانێ، بھار و نووبوون و رۆناھی و ئازادیە. نەورۆز واتەیا ژیانەکا نوو و مزگینیا سەرکەفتنا رۆناھیێ ل سەر تاریاتیێ و زولمێ دا ددە. ب ھەلکەفتا ھاتنا جەژنا نەتەوەیی یا نەورۆزێ پیرۆزباھیێ ل مالباتێن سەربلندێن شەھیدان و پێشمەرگەیێن قەھرەمان و ھەموو چینێن خەلکێ کوردستانێ دکم. پیرۆزباھیا نەورۆزێ ل ھەموو گەلێ کورد ل هەر چار پەرچەیێن کوردستانێ دکم. پیرۆزباھیێ ل وان ھەموو نەتەوەیان دکم کو نەورۆز بەشەکە ژ دیرۆک و چاند و داب و نەریتێن وان.
ل ڤر دا دخوازم ب گەرمی پیرۆزباھیا نەورۆزێ ل رەڤەندا کوردی و ل وان ملیۆنان کوردان بکم یێن کو ب ھەستەکا بلند ڤە دووری ئاخا نیشتیمانێ خوە جەژنا نەورۆزێ بلند رادگرن و نرخێن نەورۆزێ ل ھەموو جیھانێ بەلاڤ دکن. دبێژمە وان کو ھوون ھەردەم ل ھزر و ویژدانا مە دا نە و خوەشی و جەژنێن وە بەردەوامیا خوەشی و جەژنێن مەیە. جھێ شانازیێ یە کو دبینین دەست ل ناڤ دەست و ب یەک دلی ل نەورۆزێ دا ئالا ئازادی و روومەتێ بلند دکن. گەلەک خوەشحالم کو ل باژارێ کۆلن یێ ئالمانیا ل رێورەسمەک مەزن دا ئەڤینی و سۆزا خوە ژ بۆ وەلاتێ خوە دووپات دکن، ھوون دەنگ و رەنگێ گەلێ خوە نە و دەستخوەشیێ ل وە دکم.
ل جەژنا نەتەوەیی یا نەورۆزێ دا ب روومەت ڤە تەکەز ل سەر چاندا پێکڤەژیان و پەیاما ئاشتیخوازانەیا گەلێ کوردستانێ دکم. ھەر ل ڤی واری دە پشتەڤانیێ ل پرۆسەیا ئاشتی و چارەسەریا ل ترکیێ دکین و ئاشتیێ ب تاکە رێیا راست و دروستیا چارەسەرکرنا کێشەیان دزانین. ھەر د ڤێ ھەلکەفتێ دە ب وێ ھێڤیێ نە داوی ب ئێش و ژانێن گەلێ کورد ل سووریێ بهێت و کورد ب ھەلوەستەکێ ھەڤبەش و ب رێکارێن ئاشتیانە لگەل ئالیێن دن یێن سووریێ بگھن ئەنجامەکێ کو ل خزمەتا ھەموو ئالیەک دا بت.
ھێڤیدارم نەورۆزا ئیسال ببت دەستپێکەک ژ بۆ بەختەوەری و خوەشییا ھەموو خەلکێ کوردستانێ و ئیراقێ و ئەڤ نەورۆزە و ھەموو جەژنێن خوە ل کامەرانی و بەختەوەریێ دە بکن. ھێڤیا من ئەوە گەلێن ناڤچەیێ بکارن ل بن ئارامیێ دا د رەوشەکا ئاشتیانە و برایەتیێ دا بژین.
نەورۆزا وە پیرۆز بت و بمینن د خێر و خوەشیێ دا.
مەسعوود بارزانی
30ی رەشەممەیا 2724 کوردی
20ی ئادارا 2025 زایینی
