سەرۆکێ مه‌هه‌پێ ده‌وله‌ت باخچه‌لی بانگ ل په‌كه‌كێ کر کو د چارچۆڤەیا بانگا عه‌بدوللا ئۆجالان دە، د مەها گولانێ ده ل ناڤچەیا ملازگرێ یا مووشا باکورێ کوردستانێ کۆنگرەیا خوە ساز بکە و بلەز خوە فەسخ بکە.
سەرۆکێ مه‌هه‌پێ ده‌وله‌ت باخچه‌لی دەربارێ جەژنا نەورۆزێ و مژارێن د رۆژەڤا ترکیەیێ ده داخویانیەکە نڤیسکی بەلاڤ کر.
باخچه‌لی راگهاند کو «نەورۆز سەمبۆلا یەکتی و بهەڤرەبوونا مللەتێ ترکە» و تەکەز کر کو دڤێ ئەڤ رۆژا تایبەت براتیێ بهێز بکە.
ده‌وله‌ت باخچه‌لی گۆت: «ملله‌تێ ترک دێ ب دەولەمەندیا دیرۆک و چاندا هەڤبەشا دیرۆکا ل دۆرا ئاگرێ نەورۆزێ یێ کو 21ێ ئادارێ بێ پێخستن بجڤن و دەست بدن دەستێ هەڤ و پەیوەندیێن خوە یێن ئاشتی و براتیێ بهێزتر بکن.
جەژنا نەورۆزێ نە تەنێ مزگینیا بهارێ یە و د هەمان دەمێ دە نیشانەیا هەبوون، ناسنامە و براتیا مە یا مللی یە کو کۆکا وێ کوورە».
سەرۆکێ مه‌هه‌پێ دیار کر کو جەژنا نەورۆزێ سەمبۆلا بەرەکەت و یەکتیێ و هەزکرنێ یە و گۆت:
“بەشداربوونا سەرۆککۆمارێ مەیێ برێز د پیرۆزباهیێن سبەیێن نەورۆزێ دە دەما ئەو قۆناخا هەستیارا کو وەلاتێ مە تێ دە دەرباس دبە ل بەر چاڤ بێ گرتن پێنگاڤەکە ب واتە و بنرخە.”
باخچه‌لی راگهاند کو ئەو ب هێڤییە ئارمانجا پێکانینا «ترکیەیا بێ تەرۆر» ئیسال مۆهرا خوە ل جەژنا نەورۆزێ بدە و گۆت:
“دڤێ ژ رۆژهلات هەتا رۆژئاڤا، ژ باشوور هەتا باکور مالباتا ملله‌تێ ترک ب یەکدل خوەدی ل سبەرۆژا خوە و ئەمانەتێن خوەیێن هەڤبەشێن سەردەمێن بۆری دەرکەڤە».
ده‌وله‌ت باخچه‌لی د بەردەوامیا داخویانیا خوە دە بانگا رێبەرێ په‌كه‌كێ عه‌بدوللا ئۆجالان ژی ببیرخست و گۆت:
“د ڤێ چارچۆڤەیێ دە، دڤێ رێخستنا تەرۆری یا دابەشکەر په‌كه‌كه، ژ بۆ کو بانگەوازیا 27ێ سباتێ یا ئیمرالیێ دەرەنگ نەمینە و داخوازا ملله‌تێ مەیێ عەزیز پووچ نەبە، د دەمەکە هەری کورت دە کۆنگرەیا خوە ساز بکە و بریارا خوەهلوەشنادنێ وەرگرە، د داویێ دە چەکان دەینە و خوە رادەستی کۆمارا ترکیەیێ بکە.”
باخچه‌لی ئامەژە ب وێ یەکێ دا کو درێژکرنا بریارا خوەهلوەشاندنێ یا په‌كه‌كێ دکارە ببە سەدەما کۆمپلیکاسیۆنێن نەدیار، کۆمپلۆیێن نەچاڤەرێکری و پرۆڤۆکاسیۆنێن تەڤلهەڤ و گۆت: “پێویستە رێخستنا تەرۆری یا دابەشکەر بلەز بریارا خوە بدە.”
باخچه‌لی داخواز ژ په‌كه‌كێ کر کۆنگرەیا خوەهلوەشاندنێ ل ناڤچەیا ملازگرێ یا مووشا باکورێ کوردستانێ ساز بکە و گۆت:
“تێگهیشتن و پێشنیارا مە ئەوە کو، رۆژا یەکشەمێ 4ێ گولانا 2025ان، ل ناڤچەیا ملازگرێ یا مووشێ، ب پشتگری، بەشداری و ئالیکاریا سەرۆکێ شارەداریا دەم پارتیێ، په‌كه‌كه کۆنگرەیا خوە ساز و داوی ل نیقاشێن خوەهلوەشاندنێ بینە و ڤی کاری بقەدینە».
