سەرۆک بارزانی نامەیەکا پیرۆزکرنا جەژنا نەورۆزێ ژ بۆ کوردێن باکورێ کوردستانێ ل دیاربەکرێ شاند و تێ دە تەڤی ھێڤیکرنێ ژ بۆ ئازادیا رێبەرێ پەکەکێ یێ زیندانکری عەبدوللا ئۆجالان، پشتەڤانیا خوە ژ بۆ پرۆسەیا ئاشتی و چارەسەریێ ل ترکیەیێ ژی تەکەز کر.
مەزنترین کەرنەڤال و ئاھەنگا نەورۆزێ ئیرۆ ینیێ، 21/3/2025 ل باژارێ دیاربەکرێ یێ باکورێ کوردستانێ ب ئامادەبوونا ب ملیۆنان کوردستانیان ب رێ ڤە دچیت، تێ دە پەیاما سەرۆک بارزانی ژ بۆ پیرۆزکرنا جەژنا نەتەوەیی یا نەورۆزێ ژ ئالیێ ئەندامێ مەکتەبا سیاسی یا پەدەکێ سەربەست لەزگین ڤە ھات خواندن.
ئەڤ ژی تێکستا وێ پەیامێ یە:
ب ناڤێ خودایێ مەزن و دلۆڤان
نەورۆز ژ بۆ گەلێ کوردستانێ بھار، نووبوون و رۆناھی و ئازادییە. نەورۆز واتە ژیانەکا نوو و مزگینیا سەرکەفتنا رۆناھیێ ل سەر تاریاتی و زلمێ. ب ھەلکەفتا ھاتنا جەژنا نەتەوەیی یا نەورۆزێ، ئەز پیرۆزباھیێ ل مالباتێن سەربلندێن شەھیدان و پێشمەرگەیێن قەھرەمان و تەڤایا تەخ و چینێن خەلکێ کوردستانێ دکم. ئەز پیرۆزباھیا نەورۆزێ ل ھەمی گەلێ کورد ل پارچەیێن دن یێن کوردستانێ دکم. ئەز پیرۆزباھیێ ل ھەمی وان نەتەوەیان دکمێن کو نەورۆز بەشەکە ژ دیرۆک و چاند و عەدەتێن وان.
ل ڤێ دەرێ ئەز ب گەرمی پیرۆزباھیا نەورۆزێ ل رەڤەندا کوردی و وان ب ملیۆنان کوردان دکم، یێن کو ب ھەستەکێ بلند ل دووری ئاخا وەلاتی جەژنا نەورۆزێ بلند دنرخینن و نرخێن نەورۆزێ ل ھەمی جیھانێ بەلاڤ دکن. ئەز دبێژمە وان: ھوون ھەردەم د ھزر و ویژدانا مە دە نە و خوەشی و جەژنێن وە بەردەوامیا خوەشی و جەژنێن مە نە. جھێ چانازیێ یە کو ئەم دبینین ھوون دەست ل ناڤ دەستان و ب یەک دل ل نەورۆزێ ئالایێ ئازادی و سەربلندیێ بلند دکن. ئەز گەلەک دلخوەشم کو ل باژارێ کۆلنێ یێ ئالمانیایێ، سبەھێ د مەراسیمەک مەزن دە ھوون ڤیان و سۆزا خوە ژ بۆ وەلاتێ مە تەکەز دکن. ھوون دەنگ و رەنگێن گەلێ خوە نە و ئەز دەستخوەشیێ ل وە دکم.
د جەژنا نەتەوەیی یا نەورۆزێ دە، ئەم ب شانازی ڤە تەکەزێ ل سەر فەرھەنگا پێکڤەژیانێ و پەیاما ئاشتیخوازیێ یا گەلێ کوردستانێ دکن. ھەر ب وێ نەرینێ ئەم پشتەڤانێن پرۆسەیا ئاشتیێ و چارەسەریێ ل ترکیەیێ نە و ئەم ھێڤیدارین د دەمەکێ نێزیک دە رێزدار عەبدوللا ئۆجالان بهێت ئازادکرن. ئەم ئاشتیێ وەکی یەکانە رێیا راست و دورستا دەرباسکرنا ئارێشەیان دبینین. ھەر د ڤێ ھەلکەفتێ دە، ئەم ب ھێڤی نە کو ئێش و ئازارێن گەلێ کورد ل سووریەیێ بداوی بێن، و کورد ب ھەلوەستەکێ ھەڤپار و ب رێکارێن ئاشتیانە لگەل ئالیێن دن یێن سووریەیێ بگەھن ئەنجامەکێ کو د خزمەتا ھەمی ئالیان دە بە.
ئەز ھێڤیدارم نەورۆزا ئیسال ژ بۆ رحەتی و خوەشیێ ژ بۆ ھەمی خەلکێ کوردستان و ئیراقێ ببە دەستپێکەک، و ڤێ نەورۆزێ و ھەمی جەژنێن خوە ب بەختەوەری و دلخوەشی دەرباس بکن. ئەز ھێڤیدارم گەلێن دەڤەرێ بکارن ل ژێر سیبەرا تەناھی و سەقامگریێ د رەوشەکە ئاشتیانە و براتیێ دە بژین.
نەورۆزا وە پیرۆز بت و ب خێر و خوەشی بمینن
مەسعوود بارزانی
30ێ رەشەمەھا 2724ێ یا کوردی
20ێ ئادارا 2025ێ یا زایینی
