نێچیرڤان بارزانی: پێڤاژۆیا ئاشتیێ دەرفەت و گاڤەکە دیرۆکییە
نێچیرڤان بارزانی سەرۆکێ هەرێما کوردستانێ نامەیەکا پیرۆزکرنا جەژنا نەورۆزێ ژ بۆ کوردێن باکورێ کوردستانێ ل دیاربەکرێ شاند و تێ دە راگهاند، “پێڤاژۆیا ئاشتیێ دەرفەت و گاڤەکە دیرۆکییە، دڤێت نەیێ ونداکرن و ھەر کەس ژ بۆ بسەرخستنا ئاشتیێ ب دل و جان بخەبتە.
نەمەیا نێچیرڤان بارزانی ژ ئالیێ بەردەڤکێ سەرۆکاتیا ھەرێما کوردستانێ دلشاد شەھاب کو تەڤلی نەورۆزا ئامەدێ بوو هات خوەندن.
پەیاما نێچیرڤان بارزانی یا ژ بۆ نەورۆزا ئامەدێ وسایە:
خوشک و برایێن ھێژا، گەلێ خوەشتڤییێ ئامەدێ
بەشدارێن ب روومەت یێن شاھیا نەورۆزێ.
ژ دل و جان جەژنا وە یا نەورۆزێ و سەرسالا وە یا نوو پیرۆز دکم.
نەورۆز، ئەڤ جەژنا دیرۆکی کو نیشانا ڤەژین، نووبوون، ھێڤی و ئومێدێیە، چاندەکا مە یا ھەڤپارە کو ب درێژاھیا ھەزاران سالان، کوردان و گەلێن ڤێ ھەرێمێ پێکڤە گرێ ددە.
ھێڤیدارم نەورۆزا ئیسال ببە نەورۆزا خێر و خوەشی و سەرکەفتنێ ژ بۆ وە ھەموویان.
جەژنا مەیا نەورۆزێ، ئیسال د دەمەکێ دەیە کو زەمینە و ھێڤیەک ژ بۆ ئاشتی و ئارامیێ چێ بوویە.
ژ بۆ ڤێ یەکێ ھەولێن دەولەتا ترکیێ، د سەری دە برێز سەرککۆمار رەجەب تەییب ئەردۆگان و ھەموو ھێز و ئالیێن کو کەدا وان ژ بۆنا ئاشتیێ ھەیە، ھەر وھا ھەولێن برێز ئۆجالان و ھەر کەسێ کو پشتگریێ ددە پێڤاژۆیا ئاشتیێ، گەلەک ب رێز و پێزانین دنرخینم.
پێڤاژۆیا ئاشتیێ دەرفەت و گاڤەکا دیرۆکییە، دڤێت نەیێ ونداکرن و ھەر کەس ژ بۆ بسەرکەتنا ئاشتیێ ب دل و جان بخەبتە.
گەلێ کورد ب ئاشتیێ و ب پێشخستنا چاندا بھەڤرەژیانێ، دکارە باشتر و پتر دەنگێ خوە بگھینە و مافێن خوە بدەست بخە.
ئاشتی دکارە ناڤبەرا گەل و ملەتان خوەش بکە، وەلاتان ئاڤا بکە و ژ بۆ ھەر کەسی ئارامیێ بینە.
ئەم دیسا ل ھەرێما کوردستانێ وەکی ھەر تم پشتگریا خوە ژ بۆ ئاشتیێ و بسەرکەتنا ڤێ پێڤاژۆیێ نیشان ددن.
ژ بۆ کو ئاشتی ب سەر کەڤە، چ بکەڤە سەر ملێ مە و چ ژ مە بێ خوەستن، ئەم ئامادە نە. سەرکەفتنا ئاشتیێ، سەرکەفتنا مە ھەموویانە.
د ڤێ رۆژ و جەژنا پیرۆز دە، دیسا ژ دل و جان وە ھەموویان سلاڤ دکم، جەژن و سەرسالا وە پیرۆز و ب خێر بە
ھێڤیدارم نەورۆزا ئیسال ببە نەورۆزا ئاشتی و ئارامیێ.
ھێڤیا جەژن و شاھیەکا خوەش و ب کێف، ژ بۆ وە ھەموویان دخوازم. ھوون ھەر ھەبن.
نێچیرڤان بارزانی
سە21ی ئادارا 2025ێرۆکێ هەرێما کوردستانێ
