پشتی ئاھەنگا نەورۆزێ یا باژارێ کۆلنێ یێ ئەلمانیایێ کو ھەژمارەکا زێدە یا کوردستانیێن ھەر چار پارچەیێن کوردستانێ تەڤلی وێ بوون، سەرۆک بارزانی د پەیامەکێ دە دلخوەشیا خوە ژ بۆ تەڤلیبوونا ھەژمارەکا زێدە یا وەلاتیێن کورد د وێ ئاھەنگێ دە دیار کر و گۆت، “د ئاھەنگا کۆلنێ دە رێبازا دلسۆزیا بۆ وەلات و کوردستانیبوونێ ب سەر کەفت.” کۆنفەدەراسیۆنا رەڤەندا کوردستانی ژی بەرسڤا پەیاما سەرۆک بارزانی ددە و ئاماژەیێ ددە، “ئەم پەیاما وە وەکی پشتگریەکا بھێز ژ بۆ کوردستانیان دبینن.”
کۆنفەدەراسیۆنا رەڤەندا کوردستانی ئیرۆ سێشەمبێ، 25/3/2025 بەرسڤا پەیامەکا سەرۆک بارزانی ژ بۆ ئاھەنگا نەورۆزێ یا کۆلنێ دا و گۆت، “ئەم پەیاما سەرۆک بارزانی وەکی پشتگریەکا بھێز ژ بۆ گەلێ کورد و کوردستانیان ل دیاسپۆرایێ و پارچەیێن ئاخا کوردستانێ دبینین.” ھەروەسا گۆت، “مە سپاسیێن بێ داوی ژ بۆ سەرۆک بارزانی ھەنە، کو ھەردەم پشتەڤانێ کۆنفەدەراسیۆنا رەڤەندا کوردستانییە.”
کۆنفەدەراسیۆنا رەڤەندا کوردستانی د پەیاما خوە دە ئاماژە دا سەرپەرشتێ گشتی یێ رەڤەندا کوردستانی شیفا بارزانی و بارەگایێ بارزانی، کو ب بزاڤێن وان یێن دپلۆماسی کاری سەرکەفتنەکا مەزن د ئاھەنگا نەورۆزێ یا کۆلنێ دە ب دەست بخن.
کۆنفەدەراسیۆنا رەڤەندا کوردستانی د وێ پەیامێ دە پەسنا پارتی و ئالیێن سیاسی یێن کوردستانی کر، کو ب جۆشەکا زێدە پشتەڤانیا سەرخستنا ئاھەنگا کۆلنێ کر، زێدەباری سەرۆکێ شارەداریا کۆلنێ کو ب پەیامەکا فەرمی پشکداری جەژنا وان بوو، تەڤی پۆلیسێن وی باژاری کو ئەولەھیا ئاھەنگا وان پاراست، و تەڤلیبوونا ب سەدان ھەزار کوردستانیێن ھەر چار پارچەیێن کوردستانێ ب کنجێن کوردی و ئالایێ پیرۆز یێ کوردستانێ. کۆنفەدەراسیۆنێ ئەو ئاھەنگ وەکی سەرکەفتنەکا مەزن ژ بۆ کوردستانێ وەسف کر.
پشتی برێڤەچوونا ئاھەنگا بەرفرەھا نەورۆزا کۆلنێ ل رۆژا 23/3/2025، سەرۆک بارزانی د پەیامەکێ دە دلخوەشیا خوە ژ بۆ تەڤلیبوونا ھەژمارەکا زێدە یا وەلاتیێن کورد د وێ ئاھەنگێ دە دیار کر و گۆت، “د ئاھەنگا کۆلنێ دە رێبازا دلسۆزیێ بۆ وەلات و کوردستانیبوونێ ب سەر کەفت.” ھەروەسا گۆت، “دەستەکێ نە ئەمین بزاڤا تێکدان و ئانینا گێلەشۆکێ کر و د رۆمالکرنێ دە خوەست پەیاما کۆمبوونا جەماوەری یا نەورۆزا کۆلنێ ب ئاقارەکی دن دە ببە، لێ دەنگ و رەنگێن راستین یێن بەشداربوویان رێ نەدا کو ئەو بزاڤ ب سەر بکەڤن.”
