دوھ ل باژارێ لۆزانێ ل سویسرایێ د پیرۆزباھییێن نەورۆزێ دە 5 ئەندامێن پەکەکێ ئێرشەکا فیزیکی بر سەر شاعر و چالاکڤانێ کورد ئازاد پەنابەر. ئازاد پەنابەر، ئێریش ل سەر حەسابا خوە یا مەدیایا جڤاکی پارڤە کر و وێنەیێن ئێریشکەران پارڤە کرن. پشتی ڤێ یەکێ، گەلەک پشتگری ژ ئالیێ بکارھێنەرێن مەدیایا جڤاکی ڤە بۆ ئازاد پەنابەر ھات کرن.
شاعێر و چالاکڤانێ کورد یێ ژ باکورێ کوردستانێ، ئازاد پەنابەر، دوھ ل سەر مەدیایا جڤاکی راگھاند کو د نەورۆزا لۆزانێ دە 5 ئاپۆجییان ئێریشی سەر وی کرنە. وی ھەر وھا وێنەیێن ئێریشکەران و ڤیدیۆیا ئێریشێ ژی وەشاند. تێتە گۆتن کو ئێریشکەر ئەندامێن رێخستنا پەکەکێ ل ئەورۆپا نە و خەباتکارێن سازییا “جوانێن وەلاتپارێز”ن.
ل مەدیایا جڤاکی بەرتەکەک مەزن ھات نیشاندان، گەلەک کوردان ئێریشا ل سەر پەنابەر وەکی “ئێریشا تەرۆری” بناڤ کرن. نڤیسکار و رەوشەنبیرێن کوردێن ناڤدار ژی گۆتن کو پەنابەر “پەکەکە رەخنە نەکرییە تەنێ ھنەک پێشنیارێن جودا کرنە، لێ بەلێ پەکەکە ڤێ یەکێ ژی تەحەموول ناکە”.
ئازاد پەنابەر ژ باژارێ مووشێ یە و ژ بەر زۆردەستیێن دەولەتا ترک کۆچبەری ئەورۆپایێ بوویە. بەرێ نێزیکی پەکەکێ دخەبتی، لێ نھا ب ئاوایەکی سەربخوە دخەبتە. پەنابەر د نەورۆزا سویسرایێ یا سالا بۆری دە رەخنە ل پەکەکێ کربوو و گۆتبوو: “د نەورۆزێ دە تەنێ ئالا و رەمزێن کوردی بلند بکن، رەنگێن پەکەکێ و وێنەیێن ئۆجالان نە پێویستن.” ژ وێ دەمێ ڤە پەکەکێ ئازاد پەنابەر کریە ئارمانج.
پەنابەر، کو ل سەر مەدیایا جڤاکی ب ئاوایەکی ڤەکری چ رەخنەیا ل پەکەکێ ناکەتەن و ل سەر دیرۆک و چاندا کوردی لێکۆلینا دکە، نھا ژ ئالیێ پەکەکێ ڤە تێ ئارمانجکرن. پەکەکە ب ڤێ ئێرشکارییێ دخوازە رەوشەنبیر و رۆناکبیرێن نیشتیمانپەروەرێن کورد چاڤترساندی بکە.
پشتی داخویانیا ئۆجالان د 27 شوباتێ دە، گەل و رەوشەنبیرێن کورد بەرتەک نیشان دان و گەلەک کەسان ئەڤ داخویانی ڤەکری رەخنە کرن. د ڤێ نەورۆزێ دە ژی، سەرەرای رێگرییا پەکەکێ کوردان ل گۆری واتەیا وێ نەورۆز ل دەرێن جھرەنگ بێیی پرۆپاگاندایێن پەکەکێ پیرۆز کرن. پەکەکە و رێخستنێن وێ ژ بەر ترسا کو کورد ژ بن دەستھلاتا وان دەردکەڤن، دخوازن ب گەف و زۆرێ کوردان بێدەنگ بکن.
