ته‌ڤی پێڤاژۆیا ئاشتیێ و ئاگربه‌ستا ته‌كئالی یا په‌كه‌كێ، ئێریشێن ده‌وله‌تا ترك یێن ل دژی رێخستنێ ده‌وام دكن، هه‌په‌گێ ژی راگهاند؛ گه‌ریلایان به‌رسڤا ئیریشان دا نه.
هه‌په‌گێ باسكێ له‌شكه‌ری یێ په‌كه‌كێ، ئیرۆ رۆژا چارشه‌می 26 ئادارا 2025ێ راگهاند؛ ده‌وله‌تا ترك ژ 23ی ئادارێ ڤه، ل هه‌رێمێن خاكوركێ، رۆژئاڤایێ زاپێ، سه‌رێ مه‌تینا و چیایێ گاره‌ی ب ده‌هان جاران ئێریش ل دژی چه‌كدارێن وێ ئه‌نجام دا نه.
ده‌ستنیشان كر، ئێریش ب بالافرێن شه‌ر، درۆن و هه‌لیكۆپته‌ران پێكهاتنه و گه‌له‌ك ده‌ڤه‌ر هاتنه بۆمبه‌باران كرن.
ل گۆری هه‌په‌گێ ژ 23 ئادارێ ڤه، 819 جاران چه‌كێن گران ل دژی هه‌رێمێن گه‌ریلایان یێن ل خاكورك، گاره و مه‌تینایێ هاتنه بكار ئانین، گه‌ریلایان ژی به‌رسڤا ئێریشان دا نه.
ته‌ڤی ده‌ستپێكرنا پیڤاژۆیا ئاشتیێ ل تركیه و باكورێ كوردستانێ و بانگا ئۆجالان یا چه‌كدانینا په‌كه‌كێ، ئێریشێن ده‌وله‌تا ترك هێژان ژی ده‌وام دكن، په‌كه‌كێ پشتی بانگا ئۆجالان یا 27 سباتا 2025ێ ئاگربه‌ستا ته‌كئالی راگهاندبوو.
