بابێ کەچا کو ل کۆبانێ ژ ئالیێ “جوانێن شۆرەشگەر” ڤە ھاتیە رەڤاندن، بانگ ل مەزلووم عەبدی دکە، ئەگەر کەچا وی ھەتا رۆژا یەکەما جەژنا رەمەزانێ نەڤەگەرینن، دێ داویێ ل ژیانا خوە بینە.
وەلاتیێ ژ کۆبانێ محەمەد قەواس گرتەڤیدیۆیەک بەلاڤ کر و تێ دە دبێژە، رێخستنا جوانێن شۆرەشگەر رۆژا 27ێ ئادارێ کەچا وی یا یەکانە رەڤاندیە و تێ دە بانگ ل فەرمانداریا گشتی یا ھەسەدێ دکە کو کەچا وی بۆ ڤەگەرینن.
محەمەد قەواس دبێژە: “کەچا وی ب رێیا ھەڤالەکا خوە نامەیەک شاندیە کو ئەو دخوازە ڤەگەرە مالا خوە، لێ جوانێن شۆرەشگەر کەچا وی بەرنادن.
ھەروھا دبێژە، ژ بلی وێ کەچێ، وی چ زارۆکێن دن نینە و بانگ ل ھەسەدێ، یەپەگێ و یەپەژێ دکە کو کەچا وی ڤەگەرینن، ئەگەر کەچا وی ھەتا رۆژا یەکەما جەژنێ ئازاد نەکن، ئەو دێ رۆژا یەکەما جەژنێ د دەمژمێر 12 نیڤرۆ دە، ل بەر پەیکەرێ ئارین میرکان ل باژارێ کۆبانێ، تشتەکی بینە سەرێ خوە و زیانێ بگھینە خوە.
محەمەد قەواس د گرتەڤیدیۆیەکا دن دە دبێژە، ناڤێ کەچا وی روسێلە و تەمەنێ وێ 17 سالییە و کەچا وی ل بەر دەریێ وی ل کۆبانێ ھاتیە رەڤاندن. ھەروھا بانگ ل مەزلووم عەبدی و پەکەکێ دکە تا کو کەچا وی ڤەگەرینن.
محەمەد قەواس جارەکە دن تەکەز دکە، ئەگەر کەچا وی روسێل ھەتا رۆژا یەکەما جەژنێ ڤەنەگرینن، ئەوێ داوی ل ژیانا خوە بینە.
تەڤگەرا جوانێن شۆرەشگەر، رێخستنەک سەر ب رێڤەبەریا خوەسەر ڤەیە و ب مەبەستا بچەککرنا جوان و زارۆکان، گەلەک زارۆک و جوانێن کورد ل ھەرێمێن جودایێن رۆژئاڤایێ کوردستانێ رەڤاندنە.
تەڤی کو ھەسەدێ د خزیرانا 2019 دە لگەل نەتەوێن یەکگرتی پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکاران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان بداوی نەبوویە.
مالباتێن زارۆکێن رەڤاندی ژی کریارێن تەڤگەرا جوانێن شۆرەشگەر شەرمەزار دکن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھەسەدێ بکن، تا کو چارەنڤیسا زارۆکێن وان دیار بکن.
