وەزارەتا ناڤخوەیا سووریەیێ دا خویاکرن کو، ل گەل ھەسەدێ ژ بۆ ھەردو تاخێن کوردان ل حەلەبێ ل ھەڤکرنە. تاخێن کوردی یێن ئەشرەفیە و شێخ مەقسوودێ ل پارێزگەھا حەلەبێ نە و ئەڤە دەمەک بوو ژ ئالیێ ھێزێن سووریێ ڤە ھاتبوون دۆرپێچکرن.
وەزارەت ناڤخوە یا سووریێ دبێژە: “ل گۆرا لھەڤھاتنێ ، ھێزێن کوردی ژ ھەر دو تاخێن ئەشرەفیێ و شێخ مەقسوودێ خوە ڤەدکشینن.” ھەروەسا ھەر دو ئالی ل سەر پاراستنا دەزگەھێن سڤیل ل وان ھەر دو تاخان و ئازادکرنا تەڤایا دەستەسەرکریان ل ھەڤ کر.
ھەر ل گۆر وێ راگەھاندنا وەزارەتا ناڤخوەیا سووریەیێ، ھەسەدێ و شام ل سەر ئاسانکاریێن ھاتن و چوونێ د ناڤبەرا ھەر دو تاخێن کوردی و دەڤەرێن باکورێ رۆژھلاتا وی وەلاتی دە ل ھەڤ کرینە.
ئەڤ پێنگاڤ ژی پشتی دەربازبوونا نێزیکی مەھەکێ ژ ئیمزاکرنا رێکەفتنا د ناڤبەرا فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی و سەرۆکێ سووریەیێ یێ دەمکی ئەحمەد شەرع دە ژ بۆ تێکەلکرنا ھێزێن کوردی د ناڤ ئارتێشا نوویا سووریەیێ دە تێ.
