پشتی بوویەرێن 16ێ جۆتمەھا 2017ێ، بارەگەھا مەکتەبا رێخستنا پارێزگەھا کەرکووک-گەرمیان یا پارتیا دەمۆکراتا کوردستانێ (پەدەکێ) ل کەرکووکێ ھات ڤەکرن. بەرپرسێن بارەگەهێ دبێژن: ئەم دێ ببن چاڤکانیا یەکیتی، ئاشتی و پێکڤەژیانێ ل کەرکووکێ.
پشتی 8 سالان ژ بوویەرێن 16ێ جۆتمەھێ، ئیرۆ 5/4/2025 بارەگەھا مەکەتەبا رێخستنا پارێزگەھا کەرکووک-گەرمیانێ یا پەدەکێ ب ئامادەبوونا بەرپرسێن بلند یێن پەدەکێ ھات ڤەکرن.
ئەندامێ مەکتەبا رێخستنا پەدەکێ دێدەوان کوێخا جەلال راگھاند: “ئیرۆ پشتی دەرباسبوونا نێزیکی 8 سالان ژ بوویەرێن 16 جۆتمەھێ، مە بارەگەھا رێخستنێ یا پارێزگەھا کەرکووک-گەرمیانێ ڤەکر. پشتراست بن کو ئەم دێ ل کەرکووکێ ببن چاڤکانیا یەکیتی، ئاشتی و پێکڤەژیانێ و ئەم دێ گەلەک خزمەتا کەرکووکێ کین.”
بارەگەھا سێیەمین یا پەدەکێ ژی د مژدارا سالا بۆری دە ل کەرکووکێ ھات ڤەکرن. ڤەکرنا ڤان ھەر دو بارەگەھان، د چارچۆڤەیا رێکەفتنا ھەڤپەیمانیا برێڤەبرنا دەولەتێ ژ بۆ ئاڤاکرنا حکوومەتا ئیراقێ ب سەرۆکاتیا محەمەد شیاع سوودانی ھاتیە.
پشتی بوویەرێن 16 جۆتمەھا 2017ێ، ھێزێن ئیراقی دەست دانین سەر بارەگەھێن پەدەکێ ل کەرکووکێ، ژ بەر وێ ژی پەدەکێ ھەموو چالاکیێن پارتیا خوە ل پارێزگەھێ راوەستاندن و بەشداری چ ھلبژارتنان نەبوو.
