مالپەرەکە نووچەیان یا ترکیەیێ راگهاند، ڤێ مەهێ کۆنگرەیا په‌كه‌كێ ژ بۆ دانینا چەکان دێ وەرە لدارخستن. بەریا وێ ژی شاندەیا دەم پارتیێ دێ ب عه‌بدوللا ئۆجالان و سەرۆککۆمارێ ترکیەیێ رە بجڤە.
بەریا پێنج مەهان، سەرۆکێ گشتییێ پارتیا تەڤگەرا نەتەوەپەرەست (مه‌هه‌پێ) دەڤلەت باهچەلی داخواز کر، رێبەرێ گرتییێ پارتیا کارکەرێن کوردستانێ (په‌كه‌كێ) ئابدوڵاهـ ئۆجالان کو بانگی په‌كه‌كێ بكه كو خوە هلوەشینە. ل سەر ڤێ یەکێ ژی، د 27ێ سباتێ دە ئۆجالان بانگ کر کو په‌كه‌كه چەکان دەینە و کۆنگرەیێ لدار بخە و خوە هلوەشینە.
هەر چقاس ژ مەهەکێ زێدەتر د سەر بانگا ئۆجالان رە دەرباس بوویە ژی، تەڤی کو په‌كه‌كێ ئاگربەست راگهاند، لێ ژ بۆ خوەهلوەشاندنا په‌كه‌كێ، هەڤسەرۆکێ کۆنسەیا رێڤەبەرا که‌جه‌کێ جەمیل بایک دیار کر، «دڤێ شەرت و مەرجێن تایبەت یێن ژ بۆ لدارخستنا کۆنگرەیا په‌كه‌كێ بێن پەیداکرن. ئەگەر ئەڤ یەک بێ کرن، کۆنگرە تێ لدارخستن و بریارێن ئابدوڵاهـ ئۆجالان تێن بجهانین».
مالپەرا هابەرتورکێ، د راپۆرەکە خوە دە راگهاند، تێ پێشبینی كرن کو د مەها نیسانێ دە کۆنگرەیا په‌كه‌كێ ب مەبەستا چەکدانینێ وەرە ل دار خستن. بەریا وێ ژی شاندەیا ئیمرالیێ یا پارتیا وەکهەڤی و دەمۆکراسیێ یا گەلان (دەم پارتی) دێ ل گەل سەرۆککۆمارێ ترکیەیێ رەجەپ تاییپ ئەردۆگان بجڤە. ژ بۆ ڤێ مەبەستێ ژی، تێ پایین کو د رۆژێن پێش دە، سەرۆککۆماریا ترکیەیێ دەمەکێ ژ بۆ جڤینا ب دەم پارتیێ رە دیار بکە.
ل گۆری زانیاریێن وێ مالپەرێ، پشتی جڤینا ل گەل ئەردۆگان، شاندەیا دەم پارتیێ دێ دیسا سەردانا گراڤا ئیمرالیێ بکە و جارا چارەمین ب ئابدوڵاهـ ئۆجالان رە هەڤدیتنێ بکە. تێ پێشبینی كرن کو ئۆجالان جارەکە دن تەکەزی ل سەر چەکدانینێ بکە و پشتی وێ پەیامێ ژی په‌كه‌كه د ڤێ مەهێ دە کۆنگرەیا هلوەشاندنێ لدار بخە.
د هەمان دەمێ دە، رێڤەبەریا که‌جه‌کێ د داخویانیەکێ دە ب بۆنەیا 4ێ نیسانێ، سالڤەگەرا ژدایکبوونا ئۆجالان، راگهاند: “گەل ئێدی دخوازە ئۆجالان ئازاد د ناڤا خوە دە ببینە و پێویستە بێ ئازادکرن».
هەر وها، هەڤسەرۆکا پارتیا هەرێمێن دەمۆکراتیک (ده‌به‌پێ) چیگدەم کلچگون ئوچار رەخنە ل دەستهلاتێ گرت و گۆت: «دەولەتا ترکیەیێ ل هەمبەری پێڤاژۆیا ئاشتیێ بێدەنگ مایە و ئەڤ یەک نایێ قەبوولکرن. دەستهلاتێ هەتا نها ل هەمبەر بانگا ئۆجالان پێنگاڤەکە بەربچاڤ نەئاڤێتیە».
ئەڤ گەشەدان د دەمەکێ دە تێن کو پێڤاژۆیەکە نوو ل ترکیەیێ و باکورێ کوردستانێ ب مەبەستا چارەسەرکرنا پرسا کورد دەست پێ کریە، پێڤاژۆیا کو دەستهلات وەکە «ترکیەیا بێتەرۆر» بناڤ دکە، ئالیێ کوردی ژی وێ وەکە «پێڤاژۆیا ئاشتیێ» دبینە.
