چەتەیێن پەکەکێ “جوانێن شۆرەشگەر” رۆژەکێ بەریا داوەتا وێ، کەچەکا کورد ژ گوندەوارێن کۆبانیێ رەڤاند.
ل گۆری ڤیدیۆیێن کو مالباتا وێ کەچێ ل سەر تۆرێن جڤاکی بەلاڤ کرنە، خویا دبە تەڤ پێویستیێن وێ یێن بووکینیێ “کزووت” هاتبوونە ئامادەکرن.
هەر وەها د ڤیدیۆیێ دە مالباتا وێ داخواز ژ فەرماندارێ ھێزێن سووریا دەمۆکراتیک دکە کو کەچکێ ڤەگەرینە مالا وێ.
ناڤێ کەچا هاتی رەڤاندن “رەوشەن مستەفا ئبراھیمە” و 17 سالی یە. رەوشەن ژ گوندێ کۆبارلکێ یێ گوندێ کۆبانیێ یە.
ل گۆری ڤیدیۆیێ، بابێ وێ دیار دکە کو خوشکا رەوشەنێ ژی بەریا 10 سالان ھاتیە رەڤاندن و ژ وێ رۆژێ ھەتا نھا چ ئاگاھی ل سەر وێ تونەیە.
ھەڤدەم لگەل دانووستاندنێن د ناڤبەرا ئەنجوومەنا نشتمانی یا کوردی و پارتیا یەکیتیا دەمۆکراتیک دە، رێژەیا رەڤاندنا زارۆکان ژ ئالیێ چەتەیێن پەکەکێ “جوانێن شۆرەشگەر” ڤە ل ھەرێمێن د بن کۆنترۆلا ھێزێن سووریا دەمۆکراتیک دە زێدەتر بوویە.
تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.
