سەرۆکێ ھەرێما کوردستانێ ب سەردانەکا فەرمی دێ چیتە ئیماراتێ و لگەل سەرۆکێ وی وەلاتی کۆم بیت.
سەرۆکاتیا ھەرێما کوردستانێ د راگەھاندنەکێ دە ئەشکەرە کر کو، سەرۆکێ ھەرێما کوردستانێ نێچیرڤان بارزانی ئیرۆ دوشەمبێ 7/4/2025 ب سەردانەکا فەرمی دگەھە ئەبووزەبی و لگەل سەرۆکێ ئیماراتێ شێخ محەمەد بن زایید ئەل نەھیان دجڤیت.
ل دوو وێ راگەھاندنێ، ھەر دو سەرۆک ل سەر تێکەلیێن ئیماراتێ لگەل ئیراق و ھەرێما کوردستانێ و داوی پێشھاتێن دەڤەرێ و چەند پرسێن ژ بۆ ھەر دو ئالیان گرنگ دانوستاندنان دکن.
ئەڤ سەردانە لگەل دەستپێکرنا گەرا 14ێ یا لووتکەیا ئەبووزەبی یا وەبەرھێنانێ ھەڤدەمە، کو شاندەکا وەبەرھێنانێ یا حکوومەتا ھەرێما کوردستانێ ژی تەڤلی وێ دبت.
داوی سەردانا فەرمی یا سەرۆکێ ھەرێما کوردستانێ ژ بۆ ئیماراتێ ل داویا گولانا سالا بۆری بوو. د جڤینا پار یا ناڤبەرا سەرۆکێ ھەرێما کوردستانێ و سەرۆکێ ئیماراتێ دە ل ئەبووزەبیێ، دانووستاندن ل سەر چەند پرسان ھاتبوون کرن.
تێکەلیێن دپلۆماسی و ئابۆری یێن ناڤبەرا ھەرێما کوردستانێ و ئیماراتێ د ئاستەکی بلند دە نە و بەرپرسێن ھەرێما کوردستانێ ب ئاوایەکی چالاک سەردانێن فەرمی ژ بۆ ئیماراتێ دکن.
