د راپرسیه‌كێ ده كو ل باكورێ كوردستانێ هاتیه ئه‌نجام دایین، ئاشكه‌ره بوو كو ته‌نێ ژ سه‌دی 42 ب باوه‌رن كو بانگا ئۆجالان وێ ئاشتیێ ل تركیه‌یێ و باكورێ كوردستانێ پێكبینه، نێزی سه‌دی 20ان ژی گۆتنه: ئه‌م هه‌ر ناڤه‌رۆكا بانگێ نزانن چی یه.
ناڤەندا لێکۆلینێن قادێ یا سۆسیۆ پۆلیتیکێ د ناڤبەرا 22-26ێ ئادارا 2025ان دە ل 16 باژارێن باکورێ کوردستانێ ل سەر پێڤاژۆیا نوو یا چارەسەریێ و تەڤگەرا هلبژێران لێکۆلینەک کر.
لێکۆلینا قادێ یا کو ل 16 باژاران، د ناڤ دە ئامەد، رها، دیلۆک، وان، مێردین، باتمان، قەرس، ئیدر، مووش و بەدلیس پێک هات، ب هەزار و 509 کەسان رە ل مالێن وان روو ب روو هات کرن.
ل گۆری ژ سەدی 62،3یێ بەشداران، پرسگرێکا یەکەما سەرەکە یا ترکیەیێ “قەیرانا ئابۆری و بێکاری”یە، ژ سەدی 23،7ێ بەشداران ژی “پرسگرێکا کوردان” و ژ سەدی 6،7یێ وان ژی “رەوشا پەڤچوون و توندیێ” یا هەری گرینگ دەستنیشان کرنە.
د لێکۆلینا قادێ دە ژ بەشداران هات پرسین بێ ئەو بانگا کو رێبەرێ په‌كه‌كێ ئابدوڵاهـ ئۆجالان 27ێ سباتێ ل رێخستنێ کریە دا کو چەکان دەینە چاوا دنرخینن.
ل گۆری بەرسڤێن ڤێ پرسێ، ژ سەدی 54،6ێ بەشداران پێڤاژۆ “ئەرێنی” دیتنە، لێیێن کو “نەیینی” دبینن ب گشتی ژ سەدی 14،7نە. ژ سەدی 18ێ وان ژی گۆتنە “ئەز ناڤەرۆکا نامەیێ نزانم.”
ژ بۆ پرسا “هوون باوەرن کو بانگا ئۆجالان دێ ئاشتیێ ل ترکیەیێ پێک بینە؟” ژ سەدی 42،5ێ بەشداران گۆتیە ئەرێ، ژ سەدی 21،9ێ وان گۆتیە نا، ژ سەدی 18ێ وان گۆتیە قسمەن، و ژ سەدی 17ێ وان ژی گۆتنە “ئەز ناڤەرۆکا بانگێ نزانم”.
“گەلۆ بانگا کو ئۆجالان کریە دێ پرسگرێکا کوردان چارەسەر بکە؟”
ژ بۆ پرسا “گەلۆ بانگی کو ئۆجالان کریە دێ پرسگرێکا کوردا چارەسەر بکە؟” ژ سەدی 41،8ێ بەشداران گۆتیە “ئەرێ”، ژ سەدی 21،8ێ وان گۆتیە “نا”، ژ سەدی 18،7ێ وان گۆتیە “قسمەن”، و ژ سەدی 17،7ێ وان ژی گۆتنە “ئەز ناڤەرۆکا بانگێ نزانم”.
ژ بۆ پرسا ڤەکری یا “ژ بۆ سەرکەفتنا هەولدانێن ل پەی ئاشتیا جڤاکی، ب دیتنا وە دڤێ ب پێشانیا یەکەم چ وەرە کرن؟” ژ سەدی 35،1ێ بەشداران گۆتنە “دڤێ ئەفوو دەرکەڤە”، ژ سەدی 26،9ێ وان گۆتنە “دڤێ پەڤچوون و ئۆپەراسیۆن راوەستن”، ژ سەدی 20،6ێ وان ژی گۆتنە “دڤێ سیاسەتمەدار دەڤ ژ زمانێ کوتوپلاشترکەر بەردن”.
