کاروانێ دویەمین یێ ھێزێن سووریەیا دەمۆکراتیک (ھەسەدێ) ژ تاخێن کوردان ئێن حەلەبێ دەرکەتن و بەر ب رۆژھلاتێ چەمێ فراتێ ڤە ڤەکشیان.
ئاژانسا “سانا” یا فەرمی یا سووری ئیرۆ 9ێ نیسانێ بەلاڤ کر، “د بن چاڤدێریا وەزارەتا بەرەڤانیێ و ھێزێن ئەولەکاریا گشتی دە، کاروانێ دویەمین یێ ھێزێن سووریەیا دەمۆکراتیک (ھەسەدێ) ژ تاخێن ئەشرەفیێ و شێخ مەقسوود یێن حەلەبێ دەرکەتن و بەر ب رۆژھلاتێ فراتێ ڤە کەتن رێ.”
کاروانێ یەکەم یێ ھەسەدێ/یەپەگێ رۆژا 4ێ نیسانێ ژ ھەر دو تاخێن کوردان ل حەلەبێ (ئەشرەفیێ و شێخ مەقسوود) بەر ب رۆژھلاتێ چەمێ فراتی ڤە ڤەکشیاڤوون.
ئەڤ یەک پشتی وێ تێ، ھەسەدێ و برێڤەبەریا نوویا سووریەیێ رۆژا 1 نیسانێ ل سەر تاخێن کوردی یێن حەلەبێ رێکەفتنەک ئیمزە کربوون و ل گۆری وێ رێکەفتنێ، ئەرکێ پاراستنا وان ھەر دو تاخان و ئازادکرنا تەڤاھیا گرتیان تێ کرن.
فەرمانداریا گشتی یا یەپەگێ ژی دەربارێ ڤەکشینا ھێزێن خوە ژ تاخێن شێخ مەقسوود و ئەشرەفیێ دە راگھاندبوو، “ھێزێن ئەولەکاریا ھوندرین (ئاساییش) بەرپرسیاریا پێکانینا ئەولەھیا ھەر دو تاخان ھلدگرە سەر ملێ خوە.”
ھەر د ڤێ چارچۆڤەیێ دە ژی، رۆژا 3 نیسانێ پرۆسەیا پاقژکرنا زیندانان ژ گرتیان د ناڤبەرا رێڤەبەریا ئەولەکاریا ھوندرین یا حەلەبێ و ھەسەدێ دە دەست پێ کر و 100 چەکدارێن سووری ژ ئالیێ ھەسەدێ ڤە و 150 شەرڤانێن ھەسەدێ ژی ژ ئالیێ حکوومەتا سووریەیێ ڤە ھاتن ئازادکرن.
