وەزیرێ دەرڤەیێ ترکیەیێ دبێژە، «ئەم ل بەندێنە کو په‌كه‌كه بەرسڤا بانگا ئۆجالان بدە، لێ دبە کو په‌كه‌كه ژ بەر دەستتێوەردانێن دەرەکی بەرسڤێ نەدە».
وەزیرێ دەرڤەیێ ترکیەیێ هاکان فیدان دوهـ (چارشەم، 09.04.2025) د چاڤپێکەفتنەکە تلەڤزیۆنی دە گۆت، «دڤێ حکوومەتا سووریەیێ ب خوە پرسا یه‌په‌گێ چارە بکە، لێ نابە دەمدرێژ بە».
هاکان فیدان هەروەسا گۆت، «ئامەریکا ل رۆژهلاتا ناڤین مژوولی پرسێن مەزنە و په‌كه‌كه ژ کارێن وێ یێن پێشیێ نینە». هەروەسا گۆت، «ئەم ل بەندێنە کو په‌كه‌كه بەرسڤا بانگا ئۆجالان بدە».
ناڤبری هەروەسا ئاماژە دا، «دبە کو ژ بەر دەستتێوەردانێن دەرەکی، په‌كه‌كه بەرسڤا بانگا ئۆجالان نەدە».
وەزیرێ دەرڤەیێ ترکیەیێ د دەرهەقا شنگالێ دە ژی گۆت، «دڤێ حکوومەتا ئیراقێ پرسا شنگالێ زووتر چارە بکە».
هاکان فیدان د پارەکە دن یا گۆتنێن خوە دە ئاماژە دا، «ترکیە ژ بۆ کێمکرنا ئالۆزیێن ناڤ سووریەیێ دانووستاندنێن تەکنیکی ب ئیسرائیلێ رە دکە». ئەشکەرە ژی کر، «ئەم ناخوازن ب چ وەلاتەکی رە ل سووریەیێ بکەڤن ناڤ هەڤرکیێ، نە تەنێ ئسرائیلێ».
ناڤبری تەکەز ژی کر، «گەلەک گرنگە ئەم رێیێ بدن سووریەیێ کو سیاسەتا خوە یا بەرگریێ و سیاسەتا خوە یا دەرڤە و کارووبارێن خوەیێن هەرێمی دارێژە».
وەزیرێ دەرڤەیێ ترکیەیێ د دەرهەقا ئیسرائیلێ دە گۆت، «ئۆپەراسیۆنێن نها یێن ئیسرائیلێ ل سووریەیێ خزمەتا ئەولەهیا وان و سووریەیێ ناکن، بەلکی دبە سەدەما نەسەقامگریا رۆژهلاتا ناڤین».
