سەرۆکوەزیر مەسروور بارزانی پێشوازی ل سەرۆکوەزیرێ ئیراقێ کر

سەرۆکێ حکوومەتا ھەرێما کوردستانێ ل بالافرخانەیا ناڤدەولەتی یا ھەولێرێ پێشوازی ل سەرۆکوەزیرێ ئیراقێ کر.

سەرۆکوەزیرێ ئیراقێ محەمەد شیاع سوودانی ئیرۆ رۆژا شەمبی 12/4/2025، گەھشت بالافرخانەیا ناڤدەولەتی یا ھەولێرێ و ژ ئالیێ سەرۆکێ حکوومەتا ھەرێما کوردستانێ مەسروور بارزانی ڤە پێشوازی ل وی ھات کرن.

ھەروەسا بەردەڤکێ حکوومەتا ئیراقێ باسم عەوادی ژی گۆت، “سەردانا سەرۆکوەزیر سوودانی ژ بۆ ھەولێرێ د چارچۆڤەیا پرەنسیپا پەیوەندی و دانووستاندنێن ل سەر پرسێن گرنگێن ناڤبەرا بەغدا و ھەرێما کوردستانێ دەیە، و حکوومەت دخوازە ڤێ پرسێ لگەل تەڤایا ئالیێن سیاسی یێن کو تەڤلی پرۆسەیا سیاسی بوونە بپارێزە.”

عەوادی د دەرحەقا تەوەرێ جڤینێن سەرۆکوەزیرێ ئیراقێ لگەل بەرپرسێن ھەرێما کوردستانێ گۆت، “سوودانی گەنگەشە و شێورێ دکە، کو ژ پێداچوونا پرسێن ھەڤپار ل ژێر رۆناھیا پێشھاتێن ناڤخوەیی و دەرڤەیی پێک تێ.”

ژ ھنگێ ڤە کو سوودانی بوویە سەرۆکوەزیرێ ئیراقێ، چار جاران سەردانا ھەرێما کوردستانێ کریە، جارا داویێ ژی ل رۆژا 13/11/2024 بوو. سوودانی وێ دەمێ لگەل سەرۆک بارزانی، سەرۆکێ ھەرێما کوردستانێ نێچیرڤان بارزانی و سەرۆکوەزیرێ ھەرێما کوردستانێ مەسروور بارزانی جڤیابوو.

سەرۆکوەزیر مەسروور بارزانی و سەرۆکوەزیرێ ئیراقێ د وێ جڤینێ دە بەحسا ئارێشەیا مووچەیێن ھەرێمێن کوردستانێ کر و تەکەز ل سەر پێدڤیتیا دوورخستنا پرسا خەرجکرنا مووچەیان ژ ھەر ناکۆکیەکە سیاسی کر، ھەروەسا دانووستاندن ل سەر رەوشا گشتییا ئیراق و دەڤەرێ ژی کرن.