سەرۆکێ ھەرێما کوردستانێ و وەزیرێ بەرگریێ یێ ترکیەیێ پرۆسەیا نوو یا ئاشتیێ وەکی پرۆسەیەکا “گرنگ و دیرۆکی” دحەسبینن و تەکەزێ ل سەر بسەرخستنا وێ دکن.
سەرۆکێ ھەرێما کوردستانێ نێچیرڤان بارزانی بەری نیڤرۆیا ئیرۆ رۆژا شەمبی 12/4/2025، د چارچۆڤەیا کارنامەیا خوە دە ل کۆربەندا دپلۆماسی یا ئانتالیایێ لگەل وەزیرێ بەرگریێ یێ ترکیەیێ یاشار گولەر جڤیا.
سەرۆکاتیا ھەرێما کوردستانێ د راگەھاندنەکێ دە ئاماژە دایە، “د وێ جڤینێ دە دانووستاندن ل سەر پەیوەندیێن ترکیەیێ لگەل ئیراق و ھەرێما کوردستانێ و ئالیکاریێن ھەڤپار ژ بۆ پاراستنا تەناھی و سەقامگریێ ل دەڤەرێ ھاتن کرن، ھەروەسا ھەر دو ئالیان دیتن و نەرینێن خوە ل سەر رەوشا ئیراقێ و پێشھاتێن دەڤەرێ ب ئاوایەکی گشتی ل ھەڤ گوھەرتن.”
ھەر د وێ راگەھاندنێ دە ھاتیە، “ھەر دو ئالیان پرۆسەیا ئاشتیێ ل ترکیەیێ گرنگ و دیرۆکی حەسباند و تەکەز ل سەر گرنگیا کارکرنێ ژ بۆ بسەرخستنا وێ پرۆسەیێ کر، ھەروەسا ھەر دو ئالی ل سەر گرنگیا بەردەوامکرنا کارێ پێکڤە و ھەڤاھەنگیێن ناڤبەرا وەلاتێن دەڤەرێ، ژ بۆ پاراستنا تەناھی و سەقامگریێ و دوورخستنا دەڤەرێ ژ زێدەتر ئارێشە و ئالۆزیان ھەڤنەرین بوون.”
د تەوەرەکی دن یێ وێ جڤینێ دە ژی، چەند پرسێن دن یێن ژ بۆ ھەر دو ئالیان گرنگ ھاتن بەحسکرن.
