د چارچۆڤەیا رێکەفتنا د ناڤبەرا ھەسەدێ و شامێ دە، ھێزێن حکوومەتا سووریەیێ لگەل ھێزێن ھەڤپەیمانیا ناڤدەولەتی یا ل دژی داعشێ و ھێزێن سووریا دەمۆکراتیک (ھەسەدێ) دەرباسی بەنداڤا تشرینێ بوون.
ئاژانسا “سانا” یا فەرمی یا سووریەیێ بەلاڤ کر، د چارچۆڤەیا جیبجیکرنا رێکەفتنا لگەل ھێزێن سووریا دەمۆکراتیک (ھەسەدێ) دە، ھێزێن ئارتێشا سووریەیێ و ھێزێن ئەولەکاریا گشتی یا سووری دەرباسی بەنداڤا تشرینێ ل گوندەوارێ رۆژھلاتێ حەلەبێ بوون، دا کو ئەولەھی و ئارامیێ ل دەڤەرێ فەرز بکن.
بەنداڤا تشرینێ نێزیکی 30 کیلۆمەتران ژ منبجێ دوورە و ژ مەھا بەرچلەیا بۆری ڤە شەر و پەڤچوونێن توند د ناڤبەرا ھەسەدێ و کۆمێن چەکدارێن گرێدایی ترکیەیێ دە ل وێ بەنداڤێ ھەبوون و ب دەھان کەس ژ ھەر دو ئالیان ل وێ ئەنیێ ھاتبوون کوشتن.
ھەڤدەم، فەرماندارێ گشتی یێ ھەسەدێ مەزلووم عەبدی دوھ 12 نیسانێ پێشوازی شاندەکا حکوومەتا نوویا سووریەیێ ب سەرۆکاتیا سەرۆکێ کۆمیتەیا جبجیکرنا خالێن رێکەفتنا 10ێ ئادارێ حوسێن سەلام و ئەندامەتیا محەمەد قەناتری کر.
ھەسەدێ د داخویانیەکێ دە دا زانین، د ھەڤدیتنێ دە رێیێن جبجیکرنا خالێن رێکەفتنێ ھاتن گۆتووبێژکرن و تەکەزی ل سەر گرنگیا کێمکرنا ئالۆزیان و ئاگربەستێ ل سەرانسەری سووریەیێ و د سەری دە ل بەنداڤا تشرینێ ھاتە کرن.
ھەر دو ئالیان ژی گۆتووبێژ ل سەر ئاڤاکرنا کۆمیتەیەکا تایبەت ژ بۆ لێکۆلینکرنا پرسا ڤەگەراندنا کۆچبەران بۆ جھ و وارێن خوە کرن، وەکە بەشەکە ژ چارەسەریەکا سیاسی یا بەرفرەھ.
ھەروەها د ھەڤدیتنێ دە، ناڤێن ئەندامێن کۆمیتەیێن کو دێ نوونەراتیا ھەرێمێن ھەسەدێ د دیالۆگا بهێت یا لگەل حکوومەتا شامێ دە بکن، ھاتن ئەشکەرەکرن. تێ تەخمینکرن کو خەباتێن کۆمیتەیێ د دەمەک نێزیک دە دەست پێ بکن.
سەرۆکێ قۆناغا ڤەگوھێزا سووریەیێ ئەحمەد شەرع و فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی رۆژا 10 ئادارا 2025 رێکەفتنەک ژ 8 خالان پێک دهێت ئیمزە کربوون. تێ دە تەکەزی ل سەر یەکپەرچەییا خاکا سووریەیێ، تەڤلیبوونا ھێزێن ھەسەدێ د ناڤا سازیێن دەولەتێ دە و ئاگربەستێ ھاتبوو کرن.
