یەکەم کۆنفەرانسا ژنێن کوردستانێ ئیرۆ 13ێ نیسانێ ل ھەولێرێ ب بەشداریا سەرۆک مەسعوود بارزانی و جیگرێ سەرۆکێ پارتیا دەمۆکراتا کوردستانێ (پەدەکێ) مەسروور بارزانی دەست پێ کر.
سەرۆک بارزانی گۆتارەک د کۆنفەرانسێ دە پێشکێش کر و تێ دە گۆت: “خوشک و کەچێن ھێژا، ئەز گەلەک کێفخوەشم کو ئیرۆ د کۆنفەرانسا یەکەما ب ڤی رەنگی دە تەڤلی وە دبم. ئەز ھێڤی دکم کو ئەنجام دێ ل گۆری ھێڤیێن مە ھەموویان بە. بلا ئەڤ ژ بۆ پێشەرۆژێ ببە دەستپێکەک. ئەڤ چالاکیەک پر گونجایی و د جھێ خوە دەیە و ھێڤیدارم دێ سەرکەفتی بە.”
سەرۆک بارزانی گۆت ژی: “ئەز دخوازم دوبارە بکم کو رۆلا ژنێن کورد قەت ژ یا مێران کێمتر نەبوویە، ھەکە نە زێدەتر بە ژی. وان د شۆرەشا ئیلۆنێ، شۆرەشا گولانێ و د شەرێ ل دژی داعشێ دە، رۆلەکە پر گرینگ لیستن. ئەو دایک، مامۆستە و جۆتکار بوو. ئەوێ ژ ترسا بۆمبەبارانا ئاسمانی یا ل سەر گوندێ وێ، نەچار ما کو سبەھێ زوو زارۆکێن خوە راکە، وان ببە بن کەڤرەکی یان ژی شکەفتەکێ. گەلەک جاران دایک ژ بەر زارۆکێ خوە ژی شەھید بوویە.”
ھەروھا گۆت: “نانێ پێشمەرگەیان دیسا ل سەر ژنێن کورد بوو. پێشمەرگەیەکی کو ل بەرەیێ شەر بوو، پشتراست بوو کو دێ، ھەڤژین یان خوشکا وی ل زارۆکێن وی دنێرن و نانێ وان دیسا مسۆگەرە. ژ بەر ڤێ یەکێ، دەربارێ ژنێن کورد دە ھندک تشت ھەنە کو دڤێت وەرن گۆتن. گەلەک میناکێن شۆرەشا گولانێ ھەنە، وەک دایکا ئامینا، دایکا حەلیما و دایکا عایشە. د شەرێ ل دژی داعشێ دە، کەچێن مە ئەوقاس وێرەک بوون کو ئەو ژ بۆ مە چاڤکانیا سەربلندیێ بوون. وان ب خوە چەند جاران شەر کر، یان ژی دەما داعشێ ئێریشی جھێ کو ئەو لێ بوون کر، وان ب قەھرەمانی شەر کر.”
سەرۆک بارزانی گۆت: “ئەز گەلەک کێفخوەشم کو دبینم ھەژمارەکا مەزن ژ ژنان د زانینگەھ، پەیمانگەھ، گەلەک وارێن دن و گەلەک دەڤەرێن دن دە رۆلەکە گرینگ دلیزن. دڤێت ژنێن کورد د ھەموو واران دە رۆلا خوە بلیزن. سلۆگانا وە یا کۆنفەرانسێ پر جوانە (ئەم دێ ب شیانێن خوە پێشەرۆژێ ئاڤا کن). ئەز ژی ژ وە رە دبێژم، ب شیانێن خوە پێشەرۆژێ ئاڤا بکن و ئەم دێ پشتگریێ بدن وە.”
ئاماژە ب وێ ژی کر، “جارا یەکەم ل ئیراقێ ژنەک ھات بداڤەکرن، کەچا کورد لەیلا قاسم بوو کو سەمبۆلا تێکۆشین، بەرخوەدان و بەردەوامیێ یە. ئەو چوون جەم وێ و ژێ رە گۆتن کو نامەیەکێ ژ بۆ ئەحمەد حەسەن بەکر بنڤیسە و لێبۆرینێ بخوازە. وێ ژ وان رە گۆت: ‘ھوون ژ وێ کێمترن کو ئەز نامەیەکا لێبۆرینێ ژ بۆ وە بنڤیسم. ئەز دێ ژ گەلێ خوە لێبۆرینێ بخوازم’. نموونەیێن ژنێن کورد گەلەکن. ب راستی، ئەڤ پێشمەرگەیێن قەھرەمان پەروەردەھیا وان شێرەژنان بوون.”
سەرۆک بارزانی دبێژە: “نھا ئەرکێ وە یێ مەزن و پیرۆز ھەیە کو ھوون ڤی نفشێ نوو پەروەردە بکن. مخابن، دژمنێن گەلێ کوردستانێ گەلەک ھەول دانە کو جوانێن مە بخاپینن. ئەگەر مرۆڤ ژ بۆ گەل و وەلاتێ خوە وەفادار نەبە، ئەو قیمەتا خوە وندا دکە. شەرێ کو وان ب ڤی رەنگی ل دژی مە کر، ژ شەرێ تانک، بالافر، چەکێن کیمیەوی و ھەتا ئەنفالێ ژی پر خەتەرناکتر و مەزنتر بوو.”
سەرۆک بارزانی د بەشەکا دن یا گۆتارا خوە دە گۆت: “دەربارێ گرینگیا ژنان و مافێن ژنان دە، ئەو ژ بۆ مە پر پیرۆزە، ژ بەر کو 120 سال بەرێ، شێخێ شەھید، شێخێ مەزن، شێخ عەبدولسەلام بارزانی یێ نەمر و پشتی وی شێخ ئەحمەد بەردەوام بوون کو دڤێت مافێن ژنان بهێن پاراستن.”
دەسنیشان کر ژی، “سبە رۆژا ئەنفالێ یە. ب سەدان، ھەکە نە ب ھەزاران بە، دایک و زارۆک ب زندی ھاتن بناخکرن. ئەم گیانێ وان ھەموو شەھیدان، ب تایبەتی ژی یێن دایکێن کو لگەل زارۆکێن خوە زندی ھاتنە بناخکرن، سلاڤ دکن. د گۆرێن بکۆمی یێن ھاتنە دیتن دە، مە چەند جاران دیتیە کو دایک و زارۆک ب ھەڤ را ھاتنە شەھیدکرن.”
سەرۆک بارزانی گۆت: “یا گرینگ، دڤێت تێکۆشین بەردەوام بە، دڤێت ئەم خوە نەچەمینن، دڤێت ھەر دەری و ھەر دەرفەت ژ بۆ ژنان وەرە ڤەکرن، دا کو رۆلا خوە باش بلیزن. ئەز پشتراستم کو ھوون ژی دکارن رۆلا خوە بلیزن. ئەز دخوازم دوبارە بکم کو دڤێت ھوون درووشمەیا خوە بجیھ بینن و ئەم دێ ب ھەموو ھێزا خوە ل پشت وە بن.”
