رێخستنا په‌كه‌كێ دیار کر کو هەر چەند وان ژ بۆ سەرخستنا پێڤاژۆیا ئاشتیێ ئاگربەستەکە یەکالی راگهاندیە ژی، لێ ئارتێشا ترکیەیێ د 5 رۆژان دە هەزار و 26 جاران بارەگەهێن وان ل هەرێما کوردستانێ بۆمبەباران کرنە.
هه‌په‌گێ باسکێ لەشکەرییێ په‌كه‌كێ ل سەر ئێرشێن ترکیەیێ داخویانیەک به‌لاڤ کر.
هه‌په‌گێ د داخویانیا خوە دە راگهاند کو تەڤی پابەندبوونا وانا ئاگربەستا کو زێدەتری مەهەکێ یە وان راگهاندیە، هێزێن ئارتێشا ترکیەیێ ئێرشێن خوە بەردەوام دکن.
هه‌په‌گێ دیار کر کو د رۆژێن 7-12ێ نیسانا 2025ان دە ئارتێشا ترکیەیێ ب درۆن، بالافرێن شەر، هاوان و تۆپاڤێژان هەزار و 26 جاران بارەگەهێن وان ل ناڤچەیێن جودایێن زاپ، گارە، مەتین، شێلادزێ، کانی ماسێ، ئاڤاشین و ئامێدیێ بۆمبەباران و تۆپباران کرنە.
ل گۆری داخویانیا هه‌په‌گێ د ئەنجامێ دە دو گەریلایان ژیانا خوە ژ دەست دایە.
هه‌په‌گێ هەر وها گۆت کو تەڤی راگهاندنا ئاگبەستێ ژی د رۆژێن 9، 10 و 12ێ مەهێ دە ل ناڤچەیێن شێلادزێ، زاپ و مەتین نەچار مانە بەرسڤا سێ ئێرشێن راستەراست بدن.
ل ئالیێ دن، شێورمەندێ راگهاندنێیێ وەزارەتا پاراستنێ یا ترکیەیێ زەکی ئاکتورک، 10ێ نیسانا 2025ان، د کۆنفەرانسەکە رۆژنامەگەریێ یا هەفتانە دە راگهاند، د هەفتەیەکێ دە، د ئەنجاما ئێرشێن ئارتێشا وەلاتێ وی یێن ل باشوورێ کوردستانێ و رۆژئاڤایێ کوردستانێ، 6 گەریلا و 12 شەرڤانان ژیانا خوە ژ دەست دایە.
