چاڤکانیێن خوەجھی ل باژارێ کۆبانێ یێ رۆژئاڤا کوردستانێ وندابوونا ئەحمەد محەمەد بۆزان ئەشکەرە کر، ئەحمەد ژ داییکبوویێ 6ێ گولانا 2011ێ یە، مالباتا ڤی زارۆکی ژی تەڤگەرا “جوانێن شۆرەشگەر” ب رەڤاندنا وی تۆمەتبار دکن.
ل گۆر گۆتنا داییکا زارۆکێ رەڤاندی رۆکەن مامۆ، ئەحمەد بەری چەند ھەفتیان وەکە ھەر جارێ ژ بۆ دابینکرنا پێدڤیێن ژیانێ یێن مالباتێ دەرکەتبوو سەر کار، لێ جارەکە دن ڤەنەگەریا و ھەموو نووچەیێن وی ژ نشکا ڤە وندا بوون. رۆکان وھا دبێژە: “مە ئەو ژی وەک گەلەک زارۆکێن باژێر شاندە سەر کاری، ژ بەر کو وی حەز دکر کو د مەسرەفێن مالێ دە ئالیکاریا مە بکە، لێ پشتی دەمەکێ، ئەو وندا بوو، و مە نەززانی ئەو چوو کو دەرێ.”
پشتی لێگەرینا ب رۆژان، مالبات ژ ئالیێ ھندەک کەسان ڤە ھات ئاگاھدارکرن کو ئەحمەد خوە ل دەورەیەکا گرتی یا گرێدایی جوانێن شۆرەشگەر تۆمار کریە و دێ پشترە ڤەگەرە، لێ ھەتا دەما نڤیساندنا ڤێ راپۆرتێ ئەحمەد نە ڤەگەریایە و مالباتێ ژی چ پشتراستیەکا فەرمی دەربارێ جھێ مایین و رەوشا وی وەرنەگرتیە.
دایکا زارۆکێ ئانی زمان کو مالباتێ نامەیەکا نڤیسکی ژ ئەحمەد پێگەهشتیە و وھا گۆت:
“ئەز تەڤلی جوانێن شۆرەشگەر بوومە، خەما من نەخوەن، ئەز بووم کادرۆ و دێ چم قەندیلێ.”
وێ پەیامێ دلگرانیا مالباتێ زێدە کر، ژ بەر کو وان تەکەز کر کو ئەحمەد ھێژ زارۆکە و نە هش و نە ژی شیانا وێ یەکێ هەیە کو بریارێن ب ڤی رەنگی بدە. مالباتێ دیار کر کو دەر بارێ چارەنڤیسا کورێ خوە دە چ ئاگاھیین فەرمی نەوەرگرتنە.
