سەرۆک بارزانی د سالڤەگەرا ئەنفالێ دە دبێژە، “باشترین وەفا ژ بۆ شەھیدێن ئەنفالێ ئەوە کو ئەم تەڤ ژ بۆ خزمەتکرن و پاراستنا وەلاتێ خوە یەکدەنگ بن و پێکڤە پاشەرۆژەکا گەش ژ بۆ گەلێ خوە ئاڤا بکن.”
سەرۆک بارزانی ئیرۆ دوشەمبێ 14/4/2025 پەیامەک ژ بۆ سالڤەگەرا 37ێ یا ئەنفالێ پارڤە کر و ئاماژە دا، “دڤێت دەولەتا ئیراقێ قەرەبوویا ئەنفال و وێ جینۆسایدێ بکە یا کو ل دژی گەلێ مە کریە، ھەروەسا دڤێت رێیێ ل ھەمی نەرین و سیاسەت و کریارێن شۆڤینی یێن ل دژی خەلکێ کوردستانێ ژی بگرە.”
پەیاما سەرۆک بارزانی د سالڤەگەرا 37ێ یا ئەنفالێ دە:
پرۆسەیا ئەنفالێ بەشەک ژ وان ستەم و تاوانان بوو یێن کو ل سەدسالا بۆری ژ ئالیێ رژێما بەرێ یا ئیراقێ ڤە ل دژی گەلێ مە ھاتن کرن. د ئەنجامێ وێ پرۆسەیا نەمرۆڤانە دە کو ب چەند قۆناغان ھەمی دەڤەرێن کوردستانێ ڤەگرتن، 180 ھەزار وەلاتیێن بێتاوانێن کوردستانێ ھاتن ونداکرن و شەھیدکرن. تەڤی وێ یەکێ ژی کیمیابارانکرن و سیاسەتا عەرەبیکرنێ و ڤەگوھاستن و تێکدانا ژێرخانەیا ئابۆری یا کوردستانێ و وێرانکرنا ب ھەزاران گوندان بەشەکا دن یا وان تاوانان بوو یێن کو د سەدسالا بۆری دە ژ ئالیێ رژێما ئیراقێ ڤە ل دژی گەلێ مە ھاتن کرن.
تاوانبار چوون د زبلدانا دیرۆکێ دە، لێ ھێشتا برین و شوونوارێن وێ جینۆساید و زلمێ مانە و نەھاتنە چارەکرن. دڤێت دەولەتا ئیراقێ قەرەبوویا ئەنفالێ و وێ جینۆسایدێ بکت یا کو ل دژی گەلێ مە کریە، ھەروەسا دڤێت رێیێ ل ھەمی نەرین و سیاسەت و کریارێن شۆڤینی یێن ل دژی خەلکێ کوردستانێ ژی بگرە. د 37 سالیا بیرئانینا خەمبار یا ئەنفالێ دە، باشترین وەفا ژ بۆ شەھیدێن ئەنفالێ ئەوە کو ئەم تەڤ ژ بۆ خزمەتکرن و پاراستنا وەلاتێ خوە یەکدەنگ بن و پێکڤە پاشەرۆژەکا گەش ژ بۆ گەلێ خوە ئاڤا بکن.
سەرفرازی ژ بۆ مالبات و کەسووکارێن شەھید و ئەنفالکریان، ب ھەزاران سلاڤ ل جانێ پاکژێ شەھیدێن ئەنفالێ و ھەمی شەھیدێن رێیا ئازادیا کوردستانێ.
مەسعوود بارزانی
14ێ نیسانا 2025ێ
