ئەم خالد بەگێ جبری، یوسوف زییا بەگ و ھەڤالێن وان ب رێزداری ب بیر تینن

پارتیا وەلاتپارێزێن کوردستانێ (PWK)ێ ب داخویانیەکی خالد بەگێ جبری، یوسوف زیا بەگ و ھەڤالێن وان ببیرانین.

داخویانیا PWK وھایە:

د دیرۆکا کوردستانێ دە ژ سەرھلدان و تەڤگەرێن نەتەوەیی یێن ھەری گرینگ یەک ژێ ژی تەڤگەرا نەتەوەیی یا 1925 کو وەکە سەرھلدانا شێخ سەعید تێ ناسکرن. وەکە تێ زانین، ئامادەکارییا ڤێ سەرھلدانێ ژ ئالیێ تەشکیلاتا ئازادییێ (کۆمیتەیا ئیستیقلالێ یا کوردستانێ) ڤە ھاتبوو دەستپێکرن.

تەشکیلاتا ئازادییێ د سالا 1921 دە ھاتییە دامەزراندن. سەرۆکێ وێ ژی خالد بەگێ جبری بوو. یەک ژ رێڤەبرێ تەشکیلاتا ئازادییێ ژی یوسوف زییا بەگ بوو.

لێ مخابن بەرییا کو ئامادەکارییا سەرھلدانێ تەمام ببە، دەولەتا ترکییەیێ ژ بۆ رێ ل بەر ڤێ سەرھلدانێ بگرە، د جۆتمەھا 1924 دە پێشی یوسوف زیا بەگ گرت، پاشێ ژی د 20ی چلەیا پێشین یا 1924 دە خالد بەگێ جبری گرت. دەولەتا ترکییەیێ ھەردو رێبەرێن کوردان شاندن زیندانا بەدلیسێ.

پشتی گرتنا خالد بەگێ جبری و یووسووف زییا بەگ، ب تەحریک کرنا دەولەتا ترکییەیێ، سەرھلدان بەری دەما کو ھاتبوو پلان کرن دەست پێ کر. رێبەرێ نەتەوەیی، ئۆلی و جڤاکی یێ گەلێ کوردستانێ شێخ سەعید سەرۆکاتییا ڤێ سەرھلدانێ کر.

ل گۆری بریارا دیوانا حەربێ یا بەدلیسێ کو دیوانەکا حەربێ یا کو ب دەستھلاتێن تایبەت یێن دەولەتا ترکییەیێ ڤە ھاتبوو وەزیفەدار کرن، د رۆژا 14ێ نیسانا 1925 دە، ل بەدلیسێ خالد بەگێ جبری و یوسوف زیا بەگ ھاتن کوشتن. ھەتا نھا ژی نایێ زانین کا ھەردو رێبەرێن ملەتێ کورد ب گولەبارانکرنێ یان ژی ب دارڤەکرنێ ھاتنە قەتلکرن. ھەردو رێبەرێن گەلێ کوردستانێ، ژ بەر دامەزراندنا تەشکیلاتا ئازادییێ و ئامادەکارییێن سەرھلدانەکا نەتەوەیی ھاتن قەتلکرن. د عەینی رۆژێ دە، ب قەرارا دیوانا حەربێ یا بەدلیسێ رێبەرێن ملەتێ کورد عەلی رزا بەگ، بەھائەدین بەگ، فایق بەگ و مەلا عەڤدرەحمانێ شرنەخی ژی ھاتن دارڤەکرن.

مخابن ھەتا ئیرۆ جھێ قەبرێن خالد بەگێ جبری، یوسوف زیا بەگ عەلی رزا بەگ، بەھائەدین بەگ، فایق بەگ و مەلا عەڤدرەحمانێ شرنەخی وەکە جیھێ قەبرێ شێخ سەعید، سەیید رزا و ھەڤالێن وان، سەیدێ کوردی ژی ژ ئالییێ دەولەتا ترکییەیێ ڤە نەھاتینە ئەشکەرە کرن.

ئەم ب ڤێ مناسەبەتێ جارەکا دن بانگی دەولەتا ترکییەیێ دکن کو جیھێ قەبرێن شێخ سەعید، سەیید رزا و ھەڤالێن وان، سەیدێ کوردی، خالد بەگێ جبری، یوسوف زیا بەگ، عەلی رزا بەگ، بەھائەدین بەگ، فایق بەگ و مەلا عەبدرەحمانێ شرنەخی ئەشکەرە بکن

ئەم وەکە PWK (پارتییا وەلاتپارێزێن کوردستانێ) خوە ب بەردەوامییا رێبازا تەشکیلاتا ئازادییێ، بەردەوامییا تێکۆشینا شێخ سەعید، سەیید رزا، ئیحسان نووری پاشا، خالد بەگ و یووسوف زییا بەگ و ھەڤالێن وان دبینن و ژ بۆ ئارمانجا وان یا کوردستانەکا ئازاد تێدکۆشن.

د سالڤەگەرا 100ێ یا شەھادەتا وان دە، ئەم خالد بەگێ جبری، یوسوف زییا بەگ، عەلی رزا بەگ، بەھائەدین بەگ، فایق بەگ و مەلا عەڤدرەحمان شرنەخی و ھەموو شەھیدێن کوردستانێ ب رێزداری ب بیر تینن.

14/4/2025

نڤێسینگەها راگەھاندنێ یا پارتییا وەلاتپارێزێن کوردستانێ (PWK)