12 سالن، ھەر 8 ئەفسەرێن کورد یێن ژ رێژیما سووریێ جودا بووین بێ چارەنڤیسن، تەڤی کو ل ھەرێمێن د بن دەستێ پارتیا یەکیتیا دەمۆکراتیک پەیەدێ دە ھاتبوون بنچاڤکرن، و د 16 نیسانا 2013 نووچەیێن وان ھاتنە برین، لێ پەیەدێ دان ب ھەبوونا وان ئەفسەران د زندانێن خوە دە، یان ژی رادەستکرنا وان ب رێژیما سووریێ ناکە.
مالباتێن ئەفسەرێن کوردێن رەڤاندی و رێ نیشاندەرێ وان یێ سڤیل ب بۆنەیا دووازدەھەمین سالڤەگەرا رەڤاندنا وان داخویانیەک دان. مالباتێن ڤان ئەفسەران د داخویانیا خوە دە، پارتیا یەکیتیا دەمۆکراتیک (پەیەدە) ب بەرپرسیارێ ڤێ تاوانێ دا زانین و داخوازا بەردانا وان، ئەشکەرەکرنا چارەنڤیسا وان و دادگەھکرنا ھەموو کەسێن کو دەستێ وان د رەڤاندنا ڤان ئەفسەران دە ھەیی، کر.
ئیرۆ رۆژا چارشەمبی 26/4/2025، مالباتێن ئەفسەرێن کوردێن گرتی د داخویانیەکێ دە گۆت کو ئەو بەرەڤ ھەرێما کوردستانێ دچوون لێ ژ ئالیێ پەیەدێ ڤە ھاتن گرتن و تا نھا چارەنڤیسا وان نە دیارە.
مالباتێن ئەفسەرێن گرتی بانگ ل ھەموو ئالیێن کورد کر کو دۆسەیا رەڤاندیان بکن مژارەکا سەرەکی و فشارێ ل پەیەدێ بکن ژ بۆ بەردانا وان.
ھەر وەھا نامەیێ، بانگ ل ئەمەریکا، فەرەنسا و ھەڤپەیمانیا ناڤدەولەتی کر کو فشارێ ل سەر فەرمانداریا ھەسەدێ بکن ژ بۆ دیارکرنا چارەنڤیس و بەردانا ئەفسەرێن کورد و سزاکرنا کەسێن بەرپرس د بەر رەوشێن رەڤاندنێ.
د مەھا نیسانێ 2013ێ 8 ئەفسەرێن کورد ژ ئارتێشا رێژیمێ جودا بوون، و بریارا ھاتنا ھەرێما کوردستانێ دا، پشتی کو خوە گھاندن باژارێ قامشلۆ یێ رۆژئاڤایێ کوردستانێ کو د وێ دەمێ و تا نھا ژی ئەو باژار د بن دەستێ پەیەدێ دەیە، دەنگووباسێن وان ھاتن برین.
ئەفسەرێن کورد ئەڤن:
عەمید محەمەد خەلیل ژ باژارێ بابێ یێ رۆژھلاتێ حەلەبێ
عەقید محەمەد ھەیسەم ژ باژارێ عەفرینێ
عەقید حەسەن ئۆسۆ ژ باژارێ عەفرینێ
عەقید محەمەد گولە خێری ژ باژارێ عەفرینێ
موقەدەم شەوقی عۆسمان ژ باژارێ عەفرینێ
راد بەھزاد ناسۆ ژ باژارێ عەفرینێ
نەقیب حسێن بەکر ژ باژارێ عەفرینێ
مولازم ئەوەل عەدنان بەرازی ژ باژارێ کۆبانێ
