ژ بەر کو گرووپا جوانێن شۆرەشگەر یا سەر ب پەکەکێ ڤێ داویێ چالاکیێن خوەیێن تایبەت دەربارێ رەڤاندنا زارۆکان زێدە کرینە، ئەنجوومەنا نیشتیمانی یا کورد ل سووریێ (ئەنەکەسە) ب فەرمی داخواز ژ فەرماندارێ ھێزێن سووریا دەمۆکرات (ھەسەدێ)ێ دکە وێ گرووپێ ل رۆژئاڤایێ کوردستانێ نەھێلە.
ل گۆر ئاگاهیان، د ڤان چەند ھەفتیێن بۆری دە ب تایبەت ژی ژ دەما نووچەیێن پرۆسەیا ئاشتیێ ل رۆژئاڤایێ کوردستانێ و ب تایبەت ژی خوە ھلوەشاندن و چەک دانینا پەکەکێ دەست پێ کریە، گرووپێن جوانێن شۆرەشگەر ژ بەر سەدەمێن نەدیار چالاکیێن خوە یێن ژ بۆ رەڤاندنا زارۆکان ل رۆژئاڤایێ کوردستانێ زێدە کرنە و د ڤێ چارچۆڤەیێ دە ب دەھان مالبات ل رۆژئاڤایێ کوردستانێ ڤیدیۆیا بەلاڤ دکن و ب ریجا و ھەوار داخوازا ڤەگەراندنا زارۆکێن خوە دکن.
ڤێ دەربارێ دە بەردەڤکێ فەرمی یێ ئەنەکەسێ فەیسەل یووسف راگەھاند، بەشا ھەری زێدە یا وان کەسێن ب ناڤێ گرووپا جوانێن شۆرەشگەر کار دکن، خەلکێ رۆژئاڤایێ کوردستانێ نینن، ئەرکێ وان ژی جودایە و بەشەک ژ وان بنکەیێن پارتیێن سەر ب ئەنەکەسێ دشەوتینن و ئەندامێن وان درەڤینن، بەشەک ژ وان ژی زارۆکان دخاپینن و وان درەڤینن.
ھەروەھا گۆت: “مە ب فەرمی داخواز ژ مەزلووم عەبدی کریە کو ئەو گرووپێن سەر ب پەکەکێ ل رۆژئاڤایێ کوردستانێ نەمینن.”
ھەروەھا دیار کر، مەزلووم عەبدی ژی ل وان گرووپان بێزارە و دخوازە چالاکیێن وان گرووپان بێن راوەستاندن و نەمینن.
ھێژایی گۆتنێیە پەکەکە وەک بەشەک ژ چاڤکانیا پەیداکرنا زارۆکان و جوانێن نوو پێگەھەشتی ژ بۆ بگەھینە ناڤ رێزێن خوەیێن ھێزێن چەکداری ب سالانە گرووپا جوانێن شۆرەشگەر چالاک کریە و ژ بۆ وێ ژی ب ھەزاران جوانێن رۆژئاڤایێ کوردستانێ د ناڤ رێزێن پەکەکێ دە شەر کرنە و پرانیا وان ژی د شەرێن پەکەکێ دە ھاتنە کوشتن.
