ھەڤسەرۆکا پێوەندیێن دەرڤە یا رێڤەبەریا خوەسەر ئیلھام ئەحمەد راگھاند، ئێدی سیستەمێ ناڤەندی ل سووریەیێ نایێ قەبوولکرن، دڤێت سیستەمێ سووریێ نەناڤەندی بت.
ئیلھام ئەحمەد د ھەڤدیتنەکی دە لگەل کوردستان 24ێ کو دێ ئیشەڤ ل دەرمژمێر 21:00 ب دەما ھەولێرێ وەرە وەشاندن گۆت، ئێدی سیستەمێ ناڤەندی ل سووریێ نایێ قەبوولکرن، دڤێت سیستەمێ سووریەیێ نەناڤەندی بت و ھەموو پێکھاتەیان ل خوە بگرە.
ئاماژە ب وێ ژی کر، ئەگەر سیستەمێ ناڤەندی ھاتە سەپاندن، ئەڤ یەک دێ رێ ل بەر ناکۆکی و شەرێن نوو ڤەکە.
پێشتر ژی ئیلھام ئەحمەد د چارچۆڤەیا پانەلەکا دیدارا سلێمانیێ دە ژی گۆت: “سیستەمێ ناڤەندیێ د دیرۆکێ و رەوشێن سیاسی یێن دەستنیشاکری دە دەرکەتن و لگەل خوە کریز ئانین، لەوما ئەم دبینن کو سستەما ناڤەندی یا توند، دۆز و پرسگرێکان چارەسەر ناکە، بەرووڤاژی کوورتر دکە، لەوما ئەم دبینن کو نابت سووریە ڤەگەرە بەریا سالا 2011 و دڤێت نەناڤەندی بت و مافێ پێکھاتەیان ھەموویان تێ دە پاراستی بە.”
ھەروھا گۆت ژی: “ھەلبەت ئەزموونا ھەرێما کوردستانێ ئەزموونەکا گەلەک گرنگە د دیرۆکا کورد دە. ئەم ئەزموونا ھەرێما کوردستانێ دبینن کو د رەوشەکا جیۆسیاسی یا دەستنیشانکری دە چێبوو کو ئیراق کرە دەولەتەکا فەدەرال. ھەرێما کوردستانێ ھەرێمەکا کوردییە ل جۆگرافیایا ئیراقێ. لێ ل سووریەیێ رەوش جودایە، رەوشا جیۆسیاسی جودایە، پێکھاتەیا جڤاکی جودایە و دڤێت ئەڤە ھەموو ل بەر چاڤان بهێت وەرگرتن.”
