سەرۆکێ پارتیا تەڤگەرا نەتەوەیی (مه‌هه‌پێ) تەکەزێ ل سەر وێ یەکێ دکە کو دڤێ په‌كه‌كه چەکی دانە، بەرسڤا سەرۆکێ گشتییێ جه‌هه‌پێ ژی ددە و دبێژە، «رۆن نینە کا شەری ل دژی کێ رادگەهینە».
سەرۆکێ پارتیا تەڤگەرا نەتەوەیی (مه‌هه‌پێ) دەڤلەت باخچه‌لی ئیرۆ سێشەمیێ 22 نیسانا 2025ێ پەیامەک پارڤە کریە و تێ دە راگەهاندیە، «گونجاییترین هلبژارتن ئەوە کو په‌كه‌كه کۆنگرەیێ ل دار بخە و ل دووڤ بانگا 27ێ شباتێ یا ئیمرالیێ هلوەشاندنا رێکخستنی تەمام بکە و چەکێن خوە ژی بدە دەستێ کۆمارا ترکیەیێ. دەستبەردانا ژ چەکێن خویناوی و نەقانوونی ژ بۆ نرخێن مرۆڤی وەفایە و نابە ئەڤ کار زێدەتر ڤەکێشە».
باخچه‌لی د دەرهەقا داخویانیا سەرۆکێ جه‌هه‌پێ ئۆزگور ئۆزەل دە ژی، کو دبێژە «ئەز شەری رادگەهینم»، گۆت، «لۆژیکەکە سقەتە، کورتبین و هەتا شەرمەزارییە ژی. رۆن نینە کا شەری ل بەرانبەری کێ رادگەهینە و ب کێ رە شەری دکە، چما شەری دکە؟».
شاندا ئیمرالیێ دوهی دوشه‌میێ 21 نیسانا 2025ێ ژ بۆ جارا چارێ سەردانا ئۆجالان کر و ئەنداما وێ شاندێ پەروین بولدان د کۆنفەرانسەکە رۆژنامەڤانی دە گۆت، «ئۆجالان د دەرهەقا پرۆسەیا ئاشتیێ دە راگەهاند: کاروبار بەردەوامن».
