ئیرۆ 23/4/2025 ب ئامادەبوونا سەرۆک بارزانی، سەرۆکێ ھەرێما کوردستانێ و سەرۆکێ حکوومەتا ھەرێما کوردستانێ و ھەژمارەکا زێدەیا بەرپرسێن پایەبلند و رێڤەبەرێن ئیراق، ھەرێما کوردستان و جیھانێ، ھەروەھا پارلامەنتەرێن وەلاتێن بیانی و نوونەرێن حکوومەتان ل ئامەریکا، ئەوروپا و رۆژھلاتا ناڤین، ب درووشما “بەر ب یەکبوون د باوەریێ دەع” رۆژا دوعایا نەتەوی ل ھەولێرا پایتەختا ھەرێما کوردستانێ برێڤە دچە.
د مەراسیمێ دە سەرۆک بارزانی گۆتارەک گرنگ پێشکەش کر و راگەھاند، ئەڤ یەکەم جارە جڤینەکا وەھا ل کوردستانێ تێ ب رێخستن کرن و ئارمانج ئەوە جیھان ب ڤێ چاندا دەولەمەند یا ل کوردستانێ ھەیە ناس بکە و ئەو چاند ژ کەڤن ڤە ل کوردستانێ ھەبوویە و ئەو ژی چاندا پێکڤەژیان و ھەڤ قەبوولکرن و ئازادیا رامان، ئۆل و مەزھەبە.
گۆتارا سەرۆک مەسعوود بارزانی وەھایە:
ئەڤە جارا یەکەمە کو جڤینەک وھا ل کوردستانێ تێ لدارخستن و ئارمانج ئەوە کو چاندا دەولەمەندا ل ژ دەمێن کەڤنار ڤە ل کوردستانێ ھەیە، ئانگۆ چاندا ژیانا ھەڤبەش، قەبوولکرنا ھەڤبەش و ئازادیا رامانێ، ب جیھانێ ئەم بدن ناسین.
ئەو چاندا کو ئەم پێ سەربلندین و پارێزڤانێ وێ نە، ئەم دێ ل سەر وێ رێیێ بەردەوام بن. ئەز ھێڤی دکم کو ئەڤ جڤینە ببە ئالیکار کو ئەڤ براتی و ژیانا ھەڤبەش ل کوردستانێ کوورتر و بەرفرەھتر ببە.
پەرەستنا خوەدێ خالەک ھەڤپارە ژ بۆ ئانینە جەم ھەڤ یا ئۆلێن جودا. راستی نایێ ڤەقەتاندن. گەلەک رێ ھەنە کو مرۆڤ بگھیژە راستیێ.
روومی دبێژە: راستی وەک سەرێ چیایەکییە. گەلەک رێ ھەنە کو مرۆڤ بگھیژە لووتکەیێ، لێ ئارمانج یەکە: گھیشتنا راستیێ.
ژ دەستپێکا دامەزراندنا شێخاتیا بارزان ب سەرۆکاتیا شێخ عەبدولسەلام بارزانی و شێخ ئەحمەدی بارزانی ڤە، رێزگرتنا ژ نەتەوە و ئۆلێن جودا و ھەڤدو قەبوول کرن، بەشەکێ بنگەھین یێ باوەریا مەیە.
ئایەتەک ژ قورانا پیرۆز ھەیە کو دبێژە: (يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِندَ اللَّهِ أَتْقَاكُمْ). رێبەریا مە دکە کو ئەم ل سەر باوەریا ب ھەڤ رە ژیان و قەبوولکرنا ھەڤبەش بەردەوام بن.
د سەرانسەرێ دیرۆکێ دە، دەما کو ئێریشی کوردستانێ دھات کرن، زۆرداران چ فەرق نەدکرن د ناڤبەرا مسلمان، کرستیان و ئێزدیان دە. د داویێ دە، شەرێ ل دژی داعشێ، کو جوداھی نەدخست ناڤبەرا مسلمان، کرستیان و شیعەیان، تاوانێن گران کرن. ل ھەمبەر ڤێ یەکێ، پێشمەرگەیێن قەھرەمان ب قوربانیدانەکا بێھەمپا ھەموو پاراستن و ئەفسانەیا داعشێ تێک برن، لێ ب بەدەلەکا پر، پر گران، ب قاسی 12000 شەھید و برینداران.
بلا ئەڤە ژ بۆ جڤینێن وەھا د پێشەرۆژێ دە ببە خالەک دەستپێکێ، دا کو ئەم ھەمی بزانین کو بەری ھەر تشتی، ئەم ھەمی خولامێن خوەدێ نە و ئەم ھەمی د مرۆڤاھیێ دە برا و خوشکن. ب قەبوولکرنا ھەڤدو، ب ئەڤین، ب بەختەوەری، ئەم ھەموو دکارن ب ھەڤ رە بژین، لێ لگەل زولمێ، نە بندەست و نە ژی مەزلووم دکارن بێھنا خوە ڤەدن.
ھەموو پێغەمبەران شیرەت ل مە کرنە کو ئەم دەستێ براتیێ درێژی ھەڤ بکن و ب ھەڤ رە بژین.
د داویێ دە، ئەز ژ خوەدێ دخوازم کو رێبەریا ھەر کەسی بکە، ل ھەرێمێ و ل جیھانێ ئاشتیێ ئاڤا بکە و براتیێ ئاڤا بکە. ئەز ژ بۆ وە دەمەک خوەش ل کوردستانێ دخوازم و ئەم ب وە سەربلندین و جارەکە دن ئەم ب گەرمی پێشوازیا وە ھەموویان دکن. ئەم دخوازین سپاسیا ھەموو کەسێن کو ئەڤ جڤینە رێکخستیە بکن و دەستێن ون خوەش بن.
وسلام علیكم
