بەردەڤکێ ئەنجوومەنا نیشتمانی یا کورد ل سووریێ (ئەنەکەسێ) فەیسال یووسف گۆت: “سەرۆک بارزانی دەمەکێ درێژە خوەدیێ دەستپێشخەریا یەکھەلوەستیا کوردییە، ب تایبەتی ژی پشتی رووخانا رەژیما بەشار ئەسەد.”
فەیسەل یووسف ل کۆنفەرانسا یەکرێزی و یەکھەلوەستا کوردی ل رۆژاڤایێ کوردستانێ ئیرۆ 26ێ نیسانێ گۆت: “رۆلا سەرۆک بارزانی و ھەڤکاریا مەزلووم عەبدی وھا کرن کو ملەتێ کورد ل رۆژئاڤایێ کوردستانێ بگھیژن ھەڤ، جوداھیێن خوە دەینن ئالیەکی و ببن یەک.”
ھەروھا گۆت: “سەرۆک بارزانی د پەیاما خوە دە تەکەزی ل سەر پشتگریا خوە یا ژ بۆ یەکھەلوەستیا کوردێن رۆژئاڤایێ کوردستانێ کر. ئەو داخواز دکە کو ئەم ببن ھەڤپار، بەشداری حکوومەتا سووریەیێ ببن و پێوەندیان لگەل گەلێ سووریێ خورت بکن.”
فەیسەل یووسف گۆت: “پەیاما سەرۆک بارزانی ژ بۆ کۆنفەرانسا یەکرێزی و یەکھەلوەستا کورد ل رۆژئاڤایێ کوردستانێ، پەیامەکا دیرۆکی بوو، د رۆژەکا دیرۆکی دە و د قۆناغا نوو یا سووریەیێ دە.”
بەردەڤکێ ئەنەکەسێ دبێژە: “ئەگەر کورد ل رۆژئاڤایێ کوردستانێ یەکرێز و یەکھەلوەست بن، دێ بھێز ببن و دکارن رۆلەک ب باندۆر د سووریایا نوو دە بلیزن.”
ئاماژە ب وێ یەکێ ژی کر، ئەنەکەسە داخوازا سیستەما نەناڤەندی یا سیاسی ل سووریەیێ دکە و گۆت: “کۆنفەرانس ھەر بریارەکێ دەربارێ نەناڤەندیا ئیداری دە ژی بدە، ئەم دێ وێ د بەرژەوەندیا ملەتێ کورد ل رۆژئاڤایێ کوردستانێ دە جیبجی بکن.”
