ئیرۆ ب بەشداریا زێدەتری 50 پارتیێن سیاسی و بەشداربوونا نوونەرێن جڤاکا سڤیل و تەڤگەرێن ژنان، ھەروەھا ب بەشداریا نوونەرێ سەرۆک بارزانی و ژ گەلەک ئالیێن جودا ڤە کۆنفەرانسا یەکرێزی و یەکھەلوێستییا کوردی ل رۆژئاڤایێ کوردستانێ برێڤە چوو و د کۆنفەرانسێ دە پەیاما سەرۆک بارزانی ژ ئالیێ نوونەرێ سەرۆک بارزانی حەمید دەربەندی ڤە ھات خواندن.
کۆنفەرانس پشتی ئاخافتن و گۆتووبێژان ب داوی بوو و ئەنجامنامەیەک ژ ئالیێ ئەنداما دەستەیا ھەڤسەرۆکاتیا پەیەدێ فۆزا یوسف و سەرۆکێ ئەنەکەسێ محەمەد ئیسماعیل ڤە ھات خواندن و کۆنفەرانس ب داوی بوو.
ئەنجامنامەیا کۆنفەرانسێ وەھایە:
“کۆنفەرانسا یەکرێزی و یەکھەلوەستیا کوردی ل رۆژئاڤایێ کوردستانێ د 26ێ نیسانا 2025ی دە ل باژارێ قامشلۆ پشتی دیالۆگێن دەمدرێژ و ھەولدانێن سپاسدار ژ ھەڤال و برایان ڤە، ب بەشداریا پارتیێن کوردی، رێخستنێن جڤاکا سڤیل، تەڤگەرا ژنان، رێخستنێن ژنان و چالاکڤانێن جڤاکا کوردێن سەربخوە ژ ھەرێمێن جودایێن کوردی ل سووریەیێ، ب ئارمانجا پەژراندنا دیتنەکا یەکگرتی یا کوردی ل سەر ئاڤاکرنا سووریەیەک نوو و بەشداربوونا د تەشەدانا پاشەرۆژا وێ و چارەسەرکرنا پرسگرێکا کوردی دە ھاتە لدارخستن. د ڤێ قۆناغا گرینگا دیرۆکا سووریەیێ دە، پشتی ھلوەشینا رەژیما زۆردار ل شامێ د 8ێ کانوونا پێشین یا 2024ی دە، ئەڤ رەژیما کو ئازادی و روومەتا گەلێ سووریەیێ ب ھەموو پێکھاتەیێن وێ یێن نەتەوەیی، ئۆلی و جڤاکی بنپێ کر و وەلات ل سەرانسەرێ ئەردنیگاریا سووریەیێ وێران کر و ب میلیۆنان ژ گەلێ وێ کوشتن، کۆچبەر و پەنابەر کرن و ھەر چەند گەلێ سووریەیێ ژ بۆ ھلوەشاندنا وێ رێژیمێ و بداویکرنا زۆرداریا وێ و بدەستخستنا ئازادی و روومەتا خوە قوربانی پێشکێش کرن، گەلێ کورد ل سووریەیێ ژی د رووبرووبوونا وێ رەژیمێ دە گەلەک قوربانیێن مەزن و ب ھەزاران شەھیدان دان. گەلێ کورد ب دەھان سالان تێکۆشین کر دا کو زۆرداریا نەتەوەیی ژ سەر خوە راکە و مافێن خوەیێن نەتەوەیی ب دەست بخە، ژ بۆ ئاڤاکرنا سیستەمەک دەمۆکراتیک یا پرئالی ل سووریێ ھەر دەم تێکۆشینا خوە یا نەتەوەیی ب تێکۆشینا خوە یا نیشتیمانی ڤە گرێ دا.
ل سەر بنگەھا بەرپرسیاریا دیرۆکی و بەرسڤدایینا ژ پێدڤیێن قۆناغا نھا، ئاڤاکرنا دیتنەکا سیاسی یا ھەڤبەشا کوردی کو ئیرادەیەکا کۆلەکتیف و پرۆژەیەک راستین ژ بۆ چارەسەریەکا دادمەند ژ بۆ پرسگرێکا کوردی ل سووریەیێ وەکی دەولەتەکا دەمۆکراتیک و نەناڤەندی نیشان بدە.
بەشداران دیتنا ھەڤبەشا کوردا کو ژ کۆنفەرانسێ رە ھاتە پێشکێش کرن، وەکی بەلگەیەکا دامەزرینەر کو ئیرادەیەک کۆلەکتیف دیار دکە و نێزیکاتیەک راستین ژ بۆ چارەسەریەک دادپەروەر و بەرفرەھ ژ بۆ پرسگرێکا کورد د چارچۆڤەیا سووریەیەکا یەکگرتی دە، ب ناسنامەیا خوەیا پر-ئەتنیکی، پر-ئۆلی و پر-چاندی و پر-نەتەوی کو دەستوورا وێ مافێن نەتەوەیی یێن گەلێ کورد گارانتی دکە، پابەندی پەیمان و رێکەفتنێن ناڤنەتەوەیی یێن مافێن مرۆڤانە، ئازادی و مافێن ژنان دپارێزە و دھێلە کو ئەو ب باندۆر بەشداری ھەموو سازیێن سیاسی، جڤاکی و لەشکەری ببن، پەژراندن.
ب پەژراندنا ڤێ دیتنا ھەڤبەشا کوردان، کۆنفەرانس داخوازا پەژراندنا وێ وەکی بنگەھەک ژ بۆ دیالۆگا نەتەوەیی دکە، چ د ناڤبەرا ھێزێن سیاسییێن کورد ب خوە دە بە، چ ژی د ناڤبەرا وان و رێڤەبەریا نوویا ل شامێ و ھەموو ھێزێن دنێن نەتەوەیی یێن سووریەیێ دە بە. ئەو بەشداری ئاڤاکرنا سووریەیەکا نوو دبە کو ھەموو گەلێ خوە د ناڤ خوە دە بگرە، بێیی کو یەک ژ پێکھاتەیێن وێ ژ ھۆلێ راکە یان ژی پاشگوھ بکە، دووری زھنیەتا یەکالی د رامان و پراتیکێ دە، کو روومەت و مافێن وان ب دەستووری بێیی ت جورە جوداھییێ بپارێزە و سووریە رێزێ ل تێکلیێن خوەیێن ھەرێمی و ناڤنەتەوەیی بگرە و فاکتۆرەک ئارامی و ئەولەھیێ ل ھەرێمێ بە.
د ئەنجامێ دە، کۆنفەرانسێ بریار دا کو د زووترین دەم دە شاندەیەکا ھەڤبەشا کوردی ئاڤا ببە دا کو ل سەر بنگەھا پێکانینا ڤێ دیتنێ ژ بۆ راستیەکا سیاسی بخەبتە و لگەل ئالیێن پەیوەندیدار دانووستاندن و دیالۆگێ بکە دا کو بگھیژە ناڤەرۆکا وێ و مسۆگەر بکە.
