پارتیا وەلاتپارێزێن کوردستانێ (PWK) ب دخویانیەکی کۆنفەرانسا یەکرێزی و یەکھەلوێستا کوردی یا رۆژئاڤایێ کوردستانێ پیرۆز کر.
داخویانیا پوکێ وەھایە:
ب بەشدارییا پارتییێن سییاسی، دەزگەھێن سڤیل، رێخستنێن جوان و ژنان و کەسایەتێن جڤاکیێن رۆژئاڤایێ کوردستانێ، رۆژا 26/4/2025 ل باژارێ قامشلۆیێ، ‘کۆنفەرانسا یەکرێزی و یەکھەلوەستیا کوردی یا رۆژئاڤایێ کوردستانێ’ ھاتە ل دار خستن.
کۆنفەرانسێ د ئەنجامنامەیا خوە دە، داخوازا مافێن نەتەوەیی، دەمۆکراتیک یێن گەلێ مەیێ رۆژئاڤایێ کوردستانێ و سیستەمەکا نەناڤەندی ئانی زمان و ژ بۆ لگەل رێڤەبرییا شامێ ببە مخەتاب، بریارا دییارکرنا شاندەکا ھەڤبەش ھاتە دان.
ئەم ھێڤیدارین کو ئەنجامێن کۆنفەرانسێ ل رۆژئاڤایێ کوردستانێ ژ بۆ یەکرێزی و تفاقەکا ماییندە یا نەتەوەیی، نیشتیمانی و ژ بۆ پێکانینا داخواز و ھێڤییا گەلێ مە یا د دەربارێ یەکرێزییێ دە ببە دەستپێکەک.
ئەم ھێڤیدارین کو ئەنجامێن کۆنفەرانسێ، ژ بۆ ھەڤدو قەبوول کرن و رێزلھەڤگرتنا ھەموو پارتییان کوردان یێن رۆژئاڤایێ کوردستانێ ببە دەستپێکەک و ژ پێڤاژۆیەکا نوویا کو ئازادی، دەمۆکراسی و کولتورا پڕەنگییێ لێ دەستھلاتدار بە، ببە دەستپێکەکا نوو.
ئەم ھێڤیدارین کو ئەنجامێن کۆنفەرانسێ ژ بۆ بدەستخستنا مافێن نەتەوەیی، دەمۆکراتیک و ستاتویەکا ملی، جۆگرافی، سییاسی ببە دەستپێکەک.
ئەم ھێڤیدارین کو ئەنجامێن کۆنفەرانسێ، رێ ژ بۆی وێ یەکێ ڤەکە کو گەلێ مەیێ رۆژئاڤایێ کوردستانێ، ل سەر ئەساسێ وەکھەڤییێ، ب ستاتویەکە فەدەرالی، ل گەل ھەموو گەلێن ل سوورییەیێ دژین، ببن شریکێ دەولەتا سوورییەیێ.
ئەم وەکە پارتییا وەلاتپارێزێن کوردستانێ (PWK)، ھەموو پێکھاتەیێن ڤێ کۆنفەرانسێ، رێزدار سەرۆک مەسعوود بارزانی، رێزدار مەزلووم عەبدی و ھەموو کەسایەت و ئالییێن کو د لدارخستنا کۆنفەرانسێ دە رۆل و کەدا وان ھەیە، ب ھەستێن خوەیێن نەتەوەیی و نیشتمانی پیرۆز دکن.
ئەم پشتگر و ئالیگرێن دۆزا نەتەوەیی و ئازادییێ یا خوشک و برایێن خوەیێن رۆژئاڤایێ کوردستانێ نە.
26/4/2025
نڤێسینگەها راگەھاندنێ یا پارتییا وەلاتپارێزێن کوردستانێ (PWK)
