سەرۆکێ ھەرێما کوردستانێ نێچیرڤان بارزانی، کۆنفرانسا یەکرێزی و یەکھەلوەستیا کوردی ل رۆژئاڤایێ کوردستانێ پیرۆز کر و گۆت: “سەرکەفتنا کۆنفەرانسێ ل ھەموویان پیرۆز دکم کو جھێ کێفخوەشیەکا مەزنە و دلێ گەلێ کوردستانێ ل ھەموو جھان خوەش کر.”
سەرۆکێ ھەرێما کوردستانێ نێچیرڤان بارزانی د پەیامەکێ دە راگھاند، “سپاس و دەستخوەشی ژ بۆ برێز مەزلووم عەبدی و ئەنەکەسێ و ھەموو خوشک و برایێن کو ژ بۆ لدارخستنا کۆنفەرانسا یەکرێزی و یەکھەلوێستیا کورد ل سووریێ کار کرین. سەرکەفتنا کۆنفەرانسێ ل ھەموویان پیرۆز دکم کو جھێ کێفخوەشیەکا مەزنە و دلێ گەلێ کوردستانێ ل ھەموو جھان خوەش کر.”
نێچیرڤان بارزانی دبێژە: :”ھێڤیدارم ببە سەدەما خورتکرنا یەکرێزی و یەکھەلوێستیا کورد کو تەنێ ریا مسۆگەرکرنا مافێن کوردانە ل سووریێ. ئەم ھەموو پشتگری و ئالیکاریا خوە ژ بۆ ڤان ھەولێن دلسۆز و ژ بۆ مافێن رەوایێن کوردان و ھەموو پێکھاتەیان، ھەروھا ژ بۆ ئارامی و تەناھی و ئاشتیێ ل سووریێ و ھەرێمێ دوبارە دکن.”
ب بەشداریا نێزیکی 50 پارتیێن سیاسی یێن کورد و سازیێن جڤاکا سڤیل یێن رۆژئاڤایێ کوردستانێ، دوھ 26ێ نیسانا 2025 کۆنفەرانسا یەکھەلوەستیا کورد ل باژارێ قامشلۆیێ ھات لدارخستن.
د داخویانیا داوی یا کۆنفەرناسێ دە ژی ھات گۆتن: “بەشدارێن کۆنفەرانسێ ‘دیتنا ھەڤبەشا کورد’ وەکی بەلگەیەکا بنگەھین پەژراندن. ئەڤ دیتن ئیرادەیا کۆلەکتیفا کوردان نیشان ددە و رێیەک راستین ژ بۆ چارەسەریەکا دادپەروەر و بەرفرەھا پرسگرێکا کورد د چارچۆڤەیا سووریەیەکا یەکگرتی دە پێشنیار دکە.
ھەروھا کۆنفەرانسێ بریار دا کو د زووترین دەم دە شاندەیەک ھەڤبەش ژ پارتیێن سیاسییێن کوردێن ل رۆژئاڤایێ کوردستانێ بێ ئاڤاکرن، دا کو ل سەر بنگەھا تێگھیشتن و نێرینا ھەڤپارا کو د کۆنفەرانسێ دە دەرکەتیە، ل شامێ دانووستاندنان لگەل رایەدارێن ھەیی یێن سووریەیێ بکن.
