ئه‌نجومه‌نا ئاساییشا هه‌رێما كوردستانێ، ده‌ربارێ ئێریشێن سه‌ر هێزێن پێشمه‌رگه‌یان راگهاند؛ دوهـ و ئیرۆ سبێ گرووپه‌كه ته‌رۆریستی ب بالافرێن بێمرۆڤ ئێریشا بنكه‌یێن هێزێن پێشمه‌رگه‌یان ل سینۆرێ پارێزگه‌ها دهۆكێ كر و د ئه‌نجامێ ده 5 پێشمه‌رگه بریندار بوون.
ئه‌نجومه‌نا ئاساییشا هه‌رێما كوردستانێ ئیرۆ رۆژا دوشه‌می 29 نیسانا 2025ێ داخویانی ده‌ربارێ ئێریشا ب درۆنان یا ل سه‌ر هێزێن پێشمه‌رگه‌یان ل سینۆرێ ئامێدیێ دا، ئه‌ڤ ته‌كستا وێ یه:
دوهـ و ئیرۆ گرووپه‌كه ته‌رۆریستی، د دوو ئێریشێن جودا ده ب درۆنان بنكه‌یێن هێزێن پێشمه‌رگه یێن ل سینۆرێ پارێزگه‌ها دهۆكێ هه‌ده‌ف گرتن و د ئه‌نجامێ ده 5 پێشمه‌رگه بریندار كه‌تن.
ره‌وشا برینداران باشه و پێشمه‌رگه ئاماده‌نه ب مۆراله‌كه پۆلایی به‌رسڤا هه‌ر جوره پیلان و ئێریشه‌كه ناحه‌زان بدن.
د ده‌مه‌كێ ده پێڤاژۆیا ئاشتیێ ل باكور و كۆنفه‌رانسا یه‌كتییا ئالیێن كوردستانی ل رۆژئاڤا و پێڤاژۆیا پێكئانینا كابینه‌یا ده‌هه‌مین یا حكوومه‌تا هه‌رێمێ د مه‌شن و بگه‌هن ئه‌نجامێ، هنه‌ك ئالی و گرووپ هه‌ول ددن پێڤاژۆیا ئاشتی و سه‌قامگیریا ل ده‌ڤه‌رێ خه‌را بكن.
ئه‌م ل ئه‌نجومه‌نا ئاساییشا هه‌رێما كوردستانێ زیده‌باری شه‌رمه‌زار كرنا ڤان ئێریشێن ته‌رۆریستی، هۆشداریێ ددن هه‌موو ئه‌وان گرووپ و ئالیێن ئاساییشا هه‌رێما كوردستانێ هه‌ده‌ف دگرن.
هێزێن پێشمه‌رگه و هێزێن ئاساییشا ناوخۆ ئاماده‌نه بۆ به‌رسڤدایینا گونجاو ژ بۆی هه‌ر ئێرشه‌كه تێكده‌ر.
ئه‌نجومه‌نا ئاساییشا هه‌رێما كوردستانێ
29ێ نیسانی 2025
