هەڤسەرۆکا دەم پارتیێ راگهاند، ئەو کۆنفەرانسا یەکرێزی و یەکهەلوەستا کوردی یا قامشلۆ، پرۆسەیا ئاشتیێ یا ل ترکیەیێ تێک نادە. بەروڤاژی وێ، پشتەڤانیا پرۆسەیا ئاشتیێ دکە.
هەڤسەرۆکا دەم پارتیێ تولای هاتیمۆگوڵاری بەرسڤ دا داخویانیا سەرۆکێ گشتییێ مه‌هه‌پێ دەڤلەت باخچەلی یا دەرباری کۆنفەرانسا یەکرێزی و یەکهەلوەستا کوردی و دا خویاکرن، کۆنفەرانس د خزمەتا گەلێن سووریەیێ دەیە، بەروڤاژی تێکدانێ، ئەو ژ بۆ بانگا ئابدوڵاهـ ئۆجالان پشتەڤانیەکە باشە.
هاتیمۆگوڵاری هەروها گۆت، ئەو وەک دەم پارتی ژ بۆ برێڤەچوونا پرۆسەیێ هەستیار تەڤدگەرن و پشتەڤانی ددن پرۆسەیێ کو ب دەستپێشخێریا دەڤلەت باخچەلی دەست پێ کریە.
هەڤسەرۆکا دەم پارتیێ بانگ ل دەستهلاتێ کر ژی، گاڤێن گرنگ و بلەز باڤێژە تا کو پرۆسە زووتر بگهە ئەنجامێ.
ب بەشداریا نێزیکی 50 پارتیێن سیاسی یێن کورد و سازیێن جڤاکا سڤیل یێن رۆژئاڤایێ کوردستانێ، رۆژا 26ێ نیسانا 2025ان کۆنفەرانسا یەکهەلوەستا کورد ل باژارێ قامشلۆیێ هات لدارخستن.
د داخویانیا داوی یا کۆنفەرناسێ دە ژی هات گۆتن: بەشدارێن کۆنفەرانسێ ‘دیتنا هەڤبەش یا کورد وەکی بەلگەیەکە بنگەهین پەژراندن. ئەڤ دیتن ئیرادەیا کۆلەکتیڤا کوردان نیشان ددە و رێیەک راستین ژ بۆ چارەسەریەکە دادپەروەر و بەرفرەها پرسگرێکا کورد د چارچۆڤەیا سووریەیەکە یەکگرتی دە پێشنیار دکە.
سەرۆکێ گشتییێ مهپێ دەڤلەت باخچەلی ژی گۆت، کۆنفەرانسا یەکرێزی و یەکهەلوەستا کوردی ل قامشلۆ ژ ئالیێ په‌یه‌دێ و ئه‌نه‌كه‌سێ و ب پشتەڤانیا ئامەریکا و فرانسایێ هاتیە لدارخستن. باخچەلی گۆت، د کۆنفەرانسێ دە بەحسا فەدەرالیێ هاتیە کرن، سیستەما مەرکەزی یا سووریەیێ بوویە مژارا نیقاشان. هەروها گۆت، کۆنفەرانس بێنپێکرنا رێکەفتنا د ناڤبەرا مەزلووم عەبدی و ئەحمەد شەرع دەیە.
