چەتەیێن پەکەکێ “جوانێن شۆرەشگەر” کەچەکا 14 سالی ل کۆبانێ رەڤاند

رێخستنا چەتەیان یا ب ناڤێ “جوانێن شۆرەشگەر” یا گرێدایی پارتیا کارکەرێن کوردستانێ (پەکەکێ) کەچەکا تەمەن بچووک ژ گوندەوارێ کۆبانێ ب ئارمانجا لەشکەرکرنا وێ رەڤاند.

ل گۆر ئاگاهیان، د رۆژا 16/4/2025ان دە، چەتەیێن ب ناڤێ “جوانێن شۆرەشگەر” ل گوندێ قرقوی تەحتانی یێ سەر ب باژارۆکێ کۆبانێ کەچەکا تەمەن 14 سالی یا ب ناڤێ رۆژین عەزەدین ئەحمەد ب ئارمانجا لەشکەرکرنا ب زۆرێ رەڤاندیە.

ئاگاهی ددن خویاکرن کو ئەڤ کەچا تەمەن بچووک دەما ژ دبستانێ ڤەدگەری مالا خوە، د رێ دە ژ ئالیێ چەتەیێن پەکەکێ ڤە هاتیە رەڤاندن.

تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.

 ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.