رۆژا 28 و 29ی نیسانێ، ل گوندێ بەلاڤە و گوهەرزێ کو نێزیکی ئامێدیێ نە ب درۆنان ئێریشی سەر پێشمەرگەیان هات کرن، دارکا مازی لگەل خەلکێ هەرێمێ و هندەک رایەداران هەڤدیتن چێکر و نووچە بەلاڤ کر کو ئەڤ ئێریش ژ ئالیێ پەکەکێ ڤە هاتیە ئەنجامدایین، لێ بەلێ د رۆژا یەکەم دە مەدیایا پەکەکێ وسا پارڤە کر کو ئەڤ ئێریش ژ ئالیێ دەولەتا ترک ڤە هاتیە ئەنجامدایین.
ناڤەندا راگهاندن و چاپەمەنیێ یا هەپەگێ ئیرۆ رۆژا چارشەمی 30/4/2025 تێکلداری بوویەرێ ب داخویانیەکێ ئیتیراف کر کو ئەو بوون ب درۆنا ئێریشی سەر پێشمەرگەیێن کوردستانێ کرین، پەکەکێ ژ بۆی ڤێ ئێریشا خوە وەکە هەرجار هن هێنجەتێن بێ بنەما یێن وەکە، “پەدەکە ئالیکاریا دەولەتا ترک دکە، دخوازە مە دۆرپێچ بکە، جیهێ کو پێشمەرگەیێن پەدەکێ کەتنێ جیهەکە ستراتەژیکە و ژ بۆی رێگرتنا ل تەڤگەرا مە هاتنە وێ دەرێ و هتد…” ئانین زمان.
د داخویانیا هەپەگێ دە هاتیە، فەرمانداریا مە یا ل قادا گوهەرز، بەلاڤە د 28 و 29ێ نیسانێ دە ب حەساسیەتا کو ونداھی چێنەبە، د ئاستەکە سڤک دە ژ بۆ ھشیارکرنێ دەستوەردان کریە. ئەڤ ژی دانپێدانەکە ئەشکەرە یە ل سەر ئێریشا ب مەبەست یا ژ ئالیێ پەکەکێ ڤە ل سەر پێشمەرگەیان هاتی کرن.
رۆژەکێ پاش ئێریشا پەکەکێ یا ب درۆنان ل سەر پێشمەرگەیێن کوردستانێ، دارکا مازی د راپۆرەکە خوە دە ئەشکەرە کر کو ئەڤ درۆن ژ جیهێن کو هەپەگە تێ دەیە رابوونە. درۆنێن کو د ئێریشێ دە هاتین بکارئانین ژی درۆنێن کامیکازانە کۆ د دەستێ پەکەکێ دە نە. یەکەم رۆژێ دەما ئێریش چێبووی هندەک نووچەیێن ب گومان هاتن بەلاڤکرن کو دبە درۆنا پەکەکێ دەما دچوو جیهەکا دن کەتبە ناڤا پێشمەرگەیان، لێ بەلێ ئێریشا رۆژا دویەم دەستنیشان کر کو ئەڤە ئێریشەکا پلانکرییە.
هەر وەها دارکا مازی ئەشکەرە کربوو کو گەر پەکەکە داخویانیێ بدە و ئیتیرافێ بکە ژی، وێ رۆلا مەغدوور بلیزە، هەر ئەڤ پێکهات، هەپەگێ د داخویانیا خوە دە رۆلا مەغدوور لیستیە و پەدەکە سووچبار کریە.
