کۆنفەرانسێ ئێكه‌تییا کوردان کو د 26ێ نیسانێ دا ل قامشلۆ هاته سازكرن، گاڤەک بوو کو گەلێ کورد دەمەکێ درێژ بوو ل بەندێ بوون. ئەڤ ئێكه‌تیه تنێ ب ئیمزا و ب كۆمبوونان چێنابیت، دڤێت ل مه‌یدانێن جڤاکی، سیاسی، دیبلۆماسی و د میدیایێ دا پێک بهێت، واتە کۆنفرانس دەستپێکا رێكه‌كێ یە، رێیەکا درێژ هەیە، و ناکۆکی هێشتا ژی ب دوماهی نه‌هاتینه، کوردان ب شاهی ئەڤ کۆنفرانسه پێشوازی کر، لێ هێشتا ژی ب گومانن. و ئەڤ گومانه ژی بێ بنه‌ما نینە، پێدڤی بوو كۆمبوونا رێکكەفتنا هەولێرێ ئه‌وا ب دەستپێشخەریا سەرۆک بارزانی ل 11ێ تیرمه‌ها 2012ێ چێبووی دەست پێ كربا، لێ پاشئێخستنا وێ یا 13 سالان، ئەڤ هێز و رامانێن کو رێ نەدان رێکەفتنا هەولێرێ بەرەڤ ئێكه‌تیه‌كێ ڤە بچیت هێشتا ژی زیندینە و ل مەیدانێ نە.
راستی د ئه‌ڤرۆ دا دیارە، نەدانا داخویانیێ ژ ئالیێ سالح مووسلم بۆ پەیامنێرا رووداوێ گه‌له‌ك رامان و چه‌ق ژێ دچن، لێ ئاماژێ ب راستیێ دکەت، ئەگەر تەلەفزیۆنەکا هەتەشێ یان ژی حەتتا تەرەتە کوردی مایکا خوە درێژی سالح مووسلم كربا ئەو دا ئاخڤیت. سالح مووسلم نە تەنێ کەسەکە، نوونەرێ رێڤەبەریەکێ یە. و ئەو کەسێ کو ل سەر مێزا ئێكه‌تیێ ل گەل ئالیەکێ د روونیت، مافێ وی نینە وه‌سا ب هەلوەستەکی كه‌سووكی ئالیەکێ کوردی رەد بکەت.
د هەمان دەمی دا دانا جهی ب جوانێن شۆرەشگەر کو ئۆفیسێن پەدەکەسێ و ئەنەکەسێ سۆتینه، ل رێزا پێشین یا پرۆتۆکولێ هەلوەستەکێ ئیستفزازی بوو. زیندیکرنا برینێن کەڤن بوو. ئەڤ هەلوەستێن بێی بەرپرساتی نیشانا وێ یەکێ یە کو هەموو ئالی دڤێت هەستێن خوە و فکرێن خوە هێشتا د گەلەک فلته‌ران رە دەرباس بکه‌ن.
هەڤدیتنێن ئێكه‌تیێ یێن رۆژئاڤا نە ژ بۆ شاد کرنا خەلکی چێبوون. ئەڤ ئێكه‌تی ژ بۆ ئاڤاکرنا به‌ره‌یه‌كێ کوردی هاته چێکرن. پێویسته هەموو ئالی خوە ب ڤێ ئێكه‌تیێ ڤە بگرن و ڤێ ئێكه‌تیێ بلند بکه‌ن.
هەلوەستێ پەکەکێ ژ بۆی ئێكه‌تییا رۆژئاڤا هەتا نها یێ تێکدەر بوو، دڤێت پەکەکە سیاسەتا خوە یا پەکەکەکرنا رۆژئاڤا و دەستوەردانا د رۆژئاڤا دا دانیته لایه‌كی. هەلوەستێن سەرۆک بارزانی د مژارا رۆژئاڤا دا پۆزەتیڤ و ئاڤاکەر بوون. ژ بەر ڤێ راستیێ مەزلووم عەبدی د دەستپێکا کۆنفەرانسێ دا سپاسییا سەرۆک بارزانی کر، سەرەرای کو پەکەکێ رۆژئاڤا کربوو ناڤەندا سیاسەتا دژی بارزانی لێ سەرۆک بارزانی ئەڤه نەکره کینەكا كه‌سووكی. تشتێ هاتیه کرن ل کۆبانێ، ل عەفرینێ، ل سەرێ کانیێ و هه‌ر ده‌مێ رۆژئاڤا کەفتیه د تەنگاڤیێ دا پشتگرییا وان کریه. سەرۆک بارزانی تۆل ڤه‌نه‌كر، بەلکو هیڤیی ل رۆژئاڤا چێکرن.
سەرۆک بارزانی ئه‌ندازیارێ ئێكه‌تییا رۆژئاڤایە، لێ ئەڤ یەک بێی کو دەستوەردانێ بکەت چێبوویە. پەکەکە ژی مەجبوورە سبەهی بهێته سەر ڤێ خەتێ و نه‌شێت رۆژئاڤا بکەته مه‌یدانا خوە یا تایبه‌ت، به‌رپرسێن پەیەدێ کو بەرێ پەکەکێ بوون مەجبوورن هەموو جورێن دەستوەردان و هەلوەستێن ئیستفزازی یێن ل دژی ئێكه‌تییا گەلێ کورد بلۆک بکه‌ن، به‌رپرسێن پەیەدێ ژ ئاڤاكرنا وی تێگه‌هی به‌رپرسن کو کورد پرسگرێکێن خوە نە ب دژمناتیێ بەلکو د چارچووڤێ چاڤدێریه‌كا گونجای دا چارە بکه‌ن، ژ بەر ڤێ یەکێ ژی ل ده‌ستپێكێ مەزلووم عەبدی و تەڤایا کادرێن پەیەدێ یێن کو بەرێ پەکەکە بوون، پاشەرۆژا رۆئاڤا و کوردان بۆ خوه بکه‌نه رەهبەر. ئازادیا رۆژئاڤا ئارمانجا ستراتیژی یا هەموو کوردانە، دڤێت هەموو ده‌ردوورێن سیاسی و دەستپێکێ ژی یێن رۆژئاڤا ل ڤێ ئه‌ركی خودان دەرکەڤن، ئازادیا رۆژئاڤا و چارەنووسا وێ ژ چارەنووسا پارتیان و ئیدۆلۆژیان مەزنترە.
