ئێریشا ل دژی پێشمەرگەیان، ل باکورێ کوردستانێ راستی کارڤەدانا ھات و سیاسەتمەدار و شیرۆڤەکارێن باکورێ کوردستانێ دبێژن، ئێریشبرنا سەر پێشمەرگەیان نیشانەیا خێرنەخوازیا کوردستانێیە و زیانێ ددە پێڤاژۆیا چارەسەریا پرسا کورد و ئەڤ ئێریش ژ بۆ ئاستەنگکرنا یەکیتیا ئالیێن کورد ل رۆژئاڤایێ کوردستانێ ھاتیە کرن.
پشتی کو ل دھۆکێ ئێریشی خالەک پێشمەرگەیان ھات کرن ئەڤ یەک د ناڤا سیاسەتمەدار و شیرۆڤەکاران دە راستی نەرازیبونەک بەرفرەھ ھات. سیاسەتمەدارێن باکورێ کوردستانێ دبێژن کورد د رۆژھلاتا ناڤین دە بوونە ئاکتۆرەک گرینگ، ل ترکیێ پێڤاژۆیا چارەسەریێ دەست پێ کریە، ل رۆژئاڤا بۆ یەکیتیەک نەتەوەیی و بدەستخستنا مافێن نەتەوەیی گاڤەک دیرۆکی ھاتیە ئاڤێتن و پێشمەرگەیێن کو ژ بۆی ئەڤ ھەموو پێڤاژۆ و ھەولێن نەتەوەیی سەربکەڤن شەڤ و رۆژ خەباتێ دکن راستی ئێریشێ تێن. سیاسەتمەدار دبێژن ئەڤ ئێریش نیشانەیا وێ یەکێنە کو ھێزێن ھەرێمی یێن خێرنەخوازێن کوردان د ناڤا لڤ و تەڤگەرێ دە نە.
د ڤێ دەربارێ دە، جیگرێ سەرۆکێ ھاک پارێ ھانیفی ئەرەن راگهاند: “پەکەکە نە ب سەرێ خوەیە، دبە بەشەکێ پەکەکێ ھای ژ ڤێ ئێریشێ نەبە ژی، خویایە ب دەستێ ئیرانێ ھاتیە کرن، بەشا پەکەکێ یا د بن کۆنترۆلا ئیرانێ دە ئەڤ تشت کریە، لێ بڤر ل پیێ خوە خستنە، ب سەر ناکەڤن.”
چاڤدێرێن سیاسی دبێژن دەمەکە کو رۆژھلاتا ناڤین د قۆناغەکا ھەستیار دا دەرباس دبت، ب ھەولێن سەرۆک مەسعوود بارزانی کورد کارینە سیاسەتەکا بباندۆر دەرخن ھۆلێ و ئێریشبرنا سەر پێشمەرگەیان ل دژی ڤێ سیاسەتێیە.
چاڤدێرێ سیاسی شەرەفخان گوردلی دبێژە: “ئەز وەک کوردەکی وێ ئێریشێ شەرمەزار دکم و ئەز پێ ئێشیام، دەمەکە کو ل ترکیێ پێڤاژۆیەک نو دەست پێ کریە و ل رۆژئاڤا ژی ھەولا یەکیتیێ ھەیە و بۆ وێ گاڤ ھاتیە ئاڤێتن ئەو ئێریش زرارێ ددە پێڤاژۆیێ.”
سیاسەتمەدار و شیرۆڤەکارێن باکور بالێ دکێشن کو د دیرۆکا نێزیک دە ئیستیفزازێن وسا ل دژی ھێزێن کوردان گەلەک ھاتنە کرن و ئێدی کورد دزانن کیژان بوویەر بەرژەوەندیێن وان دەیە و کیژان بوویەر د خراپیا وان دەیە.
